Մեր իրավունքն է վերադառնալ Արցախ․ չենք պատրաստվում հրաժարվել․ Սամվել Շահրամանյան. ՏԵՍԱՆՅՈՒԹ

Մեր ծննդավայր, հայրենիք վերադառնալու հարցը մեր՝ յուրաքանչյուր արցախցու իրավունքն է, և մենք չենք պատրաստվում դրանից հրաժարվել։ Այս մասին «Եռաբլուր» զինվորական պանթեոնում լրագրողների հետ զրույցում ասաց Արցախի 5-րդ նախագահ Սամվել Շահրամանյանը։

«Արցախցին իրավունք ունի վերադառնալ իր հայրենիք, իր տուն, իր գերեզմանների մոտ, դա մեզ համար փակ հարց չէ»,- ասաց Շահրամանյանը։

Հարցին` թե ինչպե՞ս, Շահրամանյանը պատասխանեց, որ դա քննարկումների հարց է, պետք է հնարավորություն ստեղծվի բանակցություններ անցկացնելու համար։

Անդրադառնալով ԵԱՀԿ Մինսկի խմբի լուծարմանը` Շահրամանյանն ասաց, որ իրենք դեմ են արտահայտվել, քանի որ դա միջազգային հարթակներում ստեղծված միակ մեխանիզմն էր՝ Արցախի հարցով զբաղվելու համար։ Բայց և ընդգծեց, որ հենց Մինսկի խմբի գոյության պայմաններում արցախցիները բռնի տեղահանվեցին։

«Հույս ունենք, որ կստեղծվեն այլ մեխանիզմներ այդ հնարավորությունից օգտվելու համար»,- հավելեց Շահրամանյանը։

Անդրադառնալով Արցախը լուծարելու վերաբերյալ իր իսկ կողմից ստորագրած փաստաթղթին, Շահրամանյանն ասաց, որ այլ տարբերակ չունեին․ դա արվել է արցախցիների անվտանգ դուրսբերումն ապահովելու համար։

«Այդ փաստաթուղթը միակ հնարավորությունն է եղել, որպեսզի ապահովեինք արցախցիների անվտանգ դուրսբերումը շրջափակումից։ Դուրս են բերվել 10,000-ից ավելի ԶՈՒ և ուժային կառույցների ներկայացուցիչներ, փորձել ենք անվտանգ դուրսբերում ապահովել։ Այդ փաստաթուղթը որևիցե իրավական ուժ չի ստացել և, շահարկումներից խուսափելու համար, տեղափոխվելուց հետո այն անվավեր ենք ճանաչել։ Եթե որևիցե մեկը համարում է, որ գոյություն ունի նման փաստաթուղթ, նույն մարդը պետք է հաշվի առնի, որ գոյություն ունի փաստաթուղթ, որով դա անվավեր է ճանաչվել։ Մեզ համար այդ թեման փակ է, և ով կուզի տեսնել Արցախը՝ կտեսնի, ով չի ուզում՝ կփնտրի պատճառներ, այդ թվում՝ նման փաստաթղթերից կառչելու»,- նշեց Սամվել Շահրամանյանը։

Մանրամասները՝ տեսանյութում։

Արփի Հակոբյան