29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Փաշինյանի հանդիպումները Պուտինի, Էրդողանի, Ալիևի հետ․ ինչ են քննարկել. ՏԵՍԱՆՅՈՒԹ
Քաղաքականություն
01.09.2025 | 17:00
Վլադիմիր Պուտին, Ռեջեփ Թայիփ Էրդողան, Իլհամ Ալիև, Սի Ցզինպին և այլք։ Աշխատանքային այցով Չինաստանում գտնվող Նիկոլ Փաշինյանը Շանհայի համագործակցության կազմակերպության ամենամյա գագաթնաժողովի շրջանակում հանդիպումներ է ունեցել մի շարք երկրների ղեկավարների հետ։
Փաշինյանն առաջինը հանդիպել է գագաթնաժողովը հյուրաընկալող երկրի՝ Չինաստանի նախագահ Սի Ցզինփինի հետ: Հայաստանի և Չինաստանի միջև ռազմավարական գործընկերություն է հաստատվել, համատեղ հայտարարություն է ընդունվել: Ըստ հայկական կողմի՝ Փաշինյանը վերահաստատել է Շանհայի համագործակցության կազմակերպությանն անդամակցելու՝ Հայաստանի ցանկությունը:
Փաշինյանն ու Աննա Հակոբյանը մասնակցել են նաև Չինաստանի նախագահի անունից տրված ընդունելությանը։
Հայաստանի վարչապետը հանդիպել է նաև Վիետնամի իր պաշտոնակցի հետ։ Քննարկել են բարեկամական հարաբերությունների և քաղաքական երկխոսության, փոխայցելությունների և դիվանագիտական շփումների օրակարգ։
Հաջոդիվ Փաշինյան-Պուտին հանդիպումն էր։ Հայկական կողմի հաղորդագրության համաձայն՝ կողմերը բարձր են գնահատել Հայաստանի և Ռուսաստանի միջև շարունակական ու ակտիվ երկխոսությունը։ Հանդիպման ընթացքում անդրադարձ է կատարվել նաև տարածաշրջանային և միջազգային նշանակության հարցերի։ Իսկ ըստ Կրեմլի՝ Փաշինյանն ու Պուտինը լավ զրույց են ունեցել, այն երկար է տևել։
Այսօր առավոտյան արդեն Փաշինյանի սոցցանցերի էջերում տեսանյութեր հայտնվեցին Թուրքիայի նախագահ Ռեջեփ Թայիփ Էրդողանի հետ հանդիպումից։ Կառավարության փոխանցմամբ՝ Փաշինյանն ու Էրդողանը կարևորել են տարածաշրջանում կայունության և խաղաղության հաստատմանը միտված քայլերը։ Փաշինյան ու Էրդողանը շեշտել են կառուցողական մոտեցումների պահպանման անհրաժեշտությունը՝ փոխվստահության մթնոլորտի ձևավորման և տարածաշրջանային հաղորդակցությունների զարգացման նպատակով։
Վաշինգտոնյան հանդիպումներից և խաղաղության պայմանագրի նախաստորագրումից շուրջ մեկ ամիս անց Փաշինյանը չինական Տյանցզինում հանդիպել է նաև Ադրբեջանի նախագահ Իլհամ Ալիևի հետ՝ քննարկելով Հայաստան-Ադրբեջան խաղաղության օրակարգը, կարևորելով կառուցողական երկխոսության, փոխվստահության և տարածաշրջանային կայունության անհրաժեշտությունը։ Կողմերն ընդգծել են Վաշինգտոնում կայացած վերջին գագաթնաժողովի արդյունքում ձևավորված դրական դինամիկան, որը վկայում է խաղաղության առաջմղման և հարաբերությունների կարգավորման գործընթացին միջազգային հանրության աջակցության մասին: Փաշինյանն ու Ալիևը պայմանավորվել են շարունակել շփումները։
Մանրամասները՝ տեսանյութում։
Մանյա Պողոսյան
