Էրդողանը Պուտինի հետ հանդիպմանը հույս է հայտնել, որ ՀՀ-Ադրբեջան բանակցությունները կհանգեցնեն խաղաղության

Թուրքական կողմը մանրամասներ է հայտնել Չինաստանում Շանհայի համագործակցության կազմակերպության գագաթնաժողովի շրջանակում տեղի ունեցած Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի հանդիպումից։

Ըստ հաղորդագրության՝ հանդիպման ընթացքում քննարկվել են Թուրքիայի և Ռուսաստանի միջև երկկողմ հարաբերությունները, ինչպես նաև տարածաշրջանային և համաշխարհային հարցեր։ Էրդողանը նշել է, որ Թուրքիայի և Ռուսաստանի հարաբերությունները շարունակում են առաջ շարժվել փոխադարձ հարգանքի և ընդհանուր շահերի հիման վրա, և որ համագործակցության երկարատև ոգին պահպանվում է առևտրի, զբոսաշրջության, ներդրումների և էներգետիկայի ոլորտներում։

Թուրքիայի նախագահը նաև ընդգծել է Անկարայի շարունակական ջանքերը Ուկրաինայում պատերազմը արդար և տևական խաղաղության միջոցով դադարեցնելու համար՝ համոզմունք հայտնելով, որ Ստամբուլի բանակցությունները նպաստում են խաղաղության գործընթացին։

Ինչ վերաբերում է Հարավային Կովկասին, նա հույս է հայտնել, որ Ադրբեջանի և Հայաստանի միջև բանակցությունները կհանգեցնեն երկարատև խաղաղության՝ հավելելով, որ Կովկասում երկարատև կայունությունը կծառայի թե՛ Թուրքիայի, թե՛ Ռուսաստանի փոխադարձ շահերին։

Հանդիպմանը նաև մտքերի փոխանակում է տեղի ունեցել Իսրայելի կողմից Գազայի վրա հարձակումների, ինչպես նաև Սիրիայի զարգացման վերաբերյալ։

Թարգմանությունը՝ Էմմա Չոբանյանի