07.12.2025 | 10:38
Հարգանքի տուրք՝ 1988-ի դեկտեմբերի 7-ի երկրաշարժի զոհերի հիշատակին
Axios․ Թրամփը մտածում է Ուկրաինայի շուրջ բանակցություններից դուրս գալու մասին
Քաղաքականություն
31.08.2025 | 12:09
ԱՄՆ նախագահ Դոնալդ Թրամփը լրջորեն դիտարկում է հրաժարվել դիվանագիտական ջանքերից՝ ուղղված Ռուսաստանի պատերազմը Ուկրաինայի դեմ դադարեցնելուն, քանի դեռ «մեկը կամ երկու կողմերը չեն սկսի ավելի շատ ճկունություն ցուցաբերել»։ Այս մասին շաբաթ օրը՝ օգոստոսի 30-ին, հայտնել է Axios պորտալը՝ վկայակոչելով Սպիտակ տան բարձրաստիճան պաշտոնյային։
Հրապարակման մեջ նշվում է, որ որոշ ամերիկացի պաշտոնյաներ սկսել են եվրոպացի առաջնորդներին համարել «հիմնական խոչընդոտ» կարգավորման ճանապարհին։ Սպիտակ տան բարձրաստիճան պաշտոնյաների կարծիքով՝ որոշ եվրոպացի առաջնորդներ հրապարակայնորեն աջակցում են Թրամփի խաղաղարար ջանքերին, սակայն գաղտնի փորձեր են անում «զրոյացնել այն առաջընթացը», որն անուղղակիորեն ձեռք էր բերվել Թրամփի և Ռուսաստանի նախագահի Վլադիմիր Պուտինի Ալյասկայում կայացած գագաթնաժողովից հետո։
Սպիտակ տան աշխատակիցները «կորցնում են համբերությունը» եվրոպացի առաջնորդների նկատմամբ, որոնք, ըստ նրանց, Ուկրաինային դրդում են «Ռուսաստանից անիրատեսական տարածքային զիջումներ պահանջել»,-գրում է Axios-ը։ Ամերիկացի պաշտոնյաների խոսքով՝ եվրոպացիները ճնշում են գործադրում Ուկրաինայի նախագահ Վլադիմիր Զելենսկու վրա, որպեսզի նա հասնի «ավելի լավ պայմանավորվածության»։
«Եվրոպացիները չեն կարող ձգձգել այս պատերազմը և գաղտնիորեն աջակցել անպատշաճ սպասումներին՝ միևնույն ժամանակ ակնկալելով, որ Ամերիկան կկրի ծախսերը»,-մեջբերում է ԶԼՄ-ն Սպիտակ տան աշխատակցի խոսքերը։
«Եթե Եվրոպան ցանկանում է այս պատերազմի էսկալացիան, դա իր գործն է։ Բայց նա անխուսափելիորեն կկրի պարտություն՝ հաղթանակի փոխարեն»,-ավելացրել է նա։
