06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Մինսկի խումբը նախատեսվում է վերջնական լուծարել մինչև 2025թ․ վերջը․ ՌԴ-ն աջակցություն է հայտնել գործընթացին
Քաղաքականություն
29.08.2025 | 12:30
Ռուսաստանն աջակցում է Ադրբեջանի և Հայաստանի համատեղ որոշմանը՝ լուծարելու Եվրոպայի անվտանգության և համագործակցության կազմակերպության (ԵԱՀԿ) Մինսկի խումբը, որը զբաղվում էր Ղարաբաղյան հակամարտության կարգավորմամբ։ Այս մասին ՌԲԿ-ին ասել է ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչը՝ մանրամասնելով, որ խումբը նախատեսվում է վերջնականապես լուծարել մինչև 2025 թվականի դեկտեմբերը։
Ըստ նրա՝ խոսքը երեք ինստիտուտների՝ Մինսկի խմբի, ԵԱՀԿ գործող նախագահի անձնական ներկայացուցչի պաշտոնի և բարձր մակարդակի պլանավորման խմբի աշխատանքի դադարեցման մասին է։
«Հաշվի առնելով կողմերի դիրքորոշումը դրանք պահպանելու աննպատակահարմարության վերաբերյալ, մենք որևէ պատճառ չենք տեսնում դրանց լուծարումը կանխելու համար»,- ասել է դիվանագետը։
Լուկաշևիչը նշել է, որ Մինսկի խմբի լուծարման ընթացակարգը հետևյալն է. ԵԱՀԿ մշտական խորհուրդը (քաղաքական խորհրդակցությունների հիմնական որոշում կայացնող մարմինը) առաջարկել է կազմակերպության անդամներին «լռելյայն համաձայնել»՝ հաստատել այս հարցի վերաբերյալ նախարարական որոշումը։ Եթե մինչև սեպտեմբերի 1-ը ոչ ոք դեմ չլինի խմբի լուծարմանը, որոշումը կհամարվի ընդունված։
«Անհրաժեշտ է հաշվի առնել, որ այս որոշման իրականացման հետ կապված վարչական և ֆինանսական միջոցառումների իրականացումը կտևի մի քանի ամիս։ ԵԱՀԿ-ն ակնկալում է դրանք ավարտել ոչ ուշ, քան այս տարվա դեկտեմբերը, որից հետո բոլոր երեք կառույցները, որոնք պատասխանատու էին Լեռնային Ղարաբաղի կարգավորմանը նպաստելու համար, պետք է դադարեն գոյություն ունենալ»,- ասել է Ռուսաստանի մշտական ներկայացուցիչը։
Հիշեցնենք, որ Ադրբեջանի ԱԳ նախարար Ջեյհուն Բայրամովը հայտարարել է, որ Մինսկի խումբը լուծարելու որոշումը կկայացվի սեպտեմբերի 1-ին։ Այնուհետև Ադրբեջանի ԱԳ փոխնախարար Յալչին Ռաֆիևն էր կրկնել, որ ԵԱՀԿ Մինսկի խմբի լուծարման վերաբերյալ վերջնական որոշումը սպասվում է սեպտեմբերի 1-ին։
Թարգմանությունը՝ Էմմա Չոբանյանի
