21.06.2026 | 19:02
Ջեյ Դի Վենսը հայտնել է Իրանի հետ բանակցություններում առաջընթացի մասին
Բաքվից կրկին պնդում են՝ Մինսկի խմբի լուծարման վերաբերյալ վերջնական որոշումը սպասվում է սեպտեմբերի 1-ին
Քաղաքականություն
27.08.2025 | 19:48
ԵԱՀԿ Մինսկի խմբի լուծարման վերաբերյալ վերջնական որոշումը սպասվում է սեպտեմբերի 1-ին։ Այս մասին լրագրողներին ասել է Ադրբեջանի արտաքին գործերի փոխնախարար Յալչին Ռաֆիևը, գրում են ադրբեջանական լրատվամիջոցները։
Նրա խոսքով՝ Հայաստանի հետ խաղաղության համաձայնագիր ստորագրելու համար եղել է երկու հիմնական պայման։
«Դրանից մեկը ԵԱՀԿ Մինսկի խմբի լուծարումն է, իսկ մյուսը՝ Հայաստանի Սահմանադրության փոփոխությունը։ Դրանցից մեկն արդեն իսկ իրականացվել է։ Ադրբեջանի և Հայաստանի արտաքին գործերի նախարարներն արդեն համատեղ դիմում են ուղարկել ԵԱՀԿ գործող նախագահին՝ Մինսկի խմբի լուծարման վերաբերյալ։ Վերջնական որոշումը սպասվում է սեպտեմբերի 1-ին»,- ասել է ադրբեջանցի պաշտոնյան։
Ըստ նրա՝ Բաքվի մյուս պայմանը դեռևս մնում է չկատարված։
«Հայաստանի Սահմանադրության մեջ փոփոխություններ կատարելուց հետո կձևավորվի խաղաղության համաձայնագրի ստորագրման համար անհրաժեշտ հիմքը։ Այս պահին սահմանադրական փոփոխությունների վերաբերյալ պաշտոնական տեղեկատվություն չկա։ Հայաստանի կողմից որևէ նախաձեռնություն չի ներկայացվել։ Բայց մենք սպասում ենք։ Իհարկե, մեր ցանկությունն է՝ հնարավորինս շուտ ստորագրել խաղաղության համաձայնագիր։ Դա կարող է տեղի ունենալ այդ փոփոխություններից հետո կարճ ժամանակում»,- ասել է Ռաֆիևը։
Հիշեցնենք, որ նախօրեին էլ Ադրբեջանի ԱԳ նախարար Ջեյհուն Բայրամովն էր հայտարարել է, որ Մինսկի խումբը լուծարելու որոշումը կկայացվի սեպտեմբերի 1-ին։
Թարգմանությունը՝ Էմմա Չոբանյանի
