19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Բայրամովը հայտարարել է, որ Մինսկի խումբը լուծարելու որոշումը կկայացվի սեպտեմբերի 1-ին
Քաղաքականություն
26.08.2025 | 16:09
ԵԱՀԿ նախարարների խորհրդի որոշման նախագիծը, որը ներկայացվել է կազմակերպության գործող նախագահին ուղղված համատեղ դիմումի հիման վրա՝ ԵԱՀԿ Մինսկի խմբի և դրա կառույցների փակման վերաբերյալ, շրջանառվել է մասնակից պետությունների շրջանում։ Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը՝ Իլհամ Ալիևի վաշինգտոնյան այցին նվիրված նախարարների կաբինետի հատուկ նիստում ունեցած ելույթում։
Բայրամովը նշել է, որ մասնակից պետություններին կոչ է արվել աջակցել որոշման ընդունման համար անհրաժեշտ ընթացակարգերին։
«Որոշումը նախատեսվում է ընդունել սեպտեմբերի 1-ին»,- ասել է նա։
Ըստ Բայրամովի՝ մինչև այս տարվա հունվարի վերջը Հայաստանը համաձայն չի եղել խաղաղության համաձայնագրի մի շարք դրույթների հետ։
«Մասնավորապես, Հայաստանը չէր ընդունում դատարաններից հայցերի հետկանչի և սահմանին երրորդ ուժերի տեղակայումը չթույլատրելու վերաբերյալ կետերը։ ԱՄՆ կատարած այցի ընթացքում Դոնալդ Թրամփի ներկայությամբ Ադրբեջանի և Հայաստանի ղեկավարների կողմից ստորագրված համատեղ հռչակագիրը հաստատում է Ադրբեջանի օրակարգը խաղաղության հաստատման ոլորտում»,- նշել է Բայրամովը։
Հիշեցնենք, որ Հայաստանն ու Ադրբեջանը խաղաղության համաձայնագիրը նախաստորագրել են օգոստոսի 8-ին Վաշինգտոնում տեղի ունեցած եռակողմ գագաթնաժողովի ընթացքում։
Թարգմանությունը՝ Էմմա Չոբանյանի
