16.07.2026 | 15:55
Վանաձորի նախկին համայնապետ Մամիկոն Ասլանյանի վերաբերյալ նոր գործ է ուղարկվել Հակակոռուպցիոն դատարան
Թրամփը համոզել է Օրբանին` դադարեցնել ԵՄ-ին Ուկրաինայի անդամակցության դեմ առարկությունները
Քաղաքականություն
27.08.2025 | 18:18
ԱՄՆ նախագահ Դոնալդ Թրամփը համոզել է Հունգարիայի վարչապետ Վիկտոր Օրբանին՝ դադարեցնել Եվրամիությանը Ուկրաինայի անդամակցության արգելափակումը։ Այս մասին հայտնում է Politico-ն, որին վկայակոչում է Meduza-ն։
Լրատվամիջոցի դիվանագիտական աղբյուրի խոսքով՝ այս փաստը «փոխել է իրավիճակը» ԵՄ-ին Ուկրաինայի անդամակցության հետ կապված։ Չի նշվում, թե ինչպես է Թրամփը համոզել Օրբանին։
Ինքը՝ Հունգարիայի վարչապետը, որևէ հրապարակային հայտարարություն չի արել այս հարցի վերաբերյալ։
Վիկտոր Օրբանը հետևողական դեմ է արտահայտվել ԵՄ-ին Ուկրաինայի անդամակցությանը, սակայն «հստակեցրել է», որ կաջակցի Մոլդովայի անդամակցությանը, որը ԵՄ թեկնածու է դարձել Ուկրաինայի հետ միաժամանակ։ Օրբանն իր դիրքորոշումը բացատրել է, մասնավորապես, այն հանգամանքով, որ Ուկրաինան պատրաստ չէ դրան, իսկ ԵՄ-ի համար դա կնշանակեր պատերազմ Ռուսաստանի հետ։
Բուդապեշտն արգելափակում է Ուկրաինայի աջակցությանն ուղղված ԵՄ նախաձեռնությունները և պարբերաբար փորձում է արգելափակել Ռուսաստանի դեմ պատժամիջոցների երկարաձգումը, ինչը պահանջում է ԵՄ բոլոր անդամների միաձայն որոշում։
Կիևի և Բուդապեշտի միջև հարաբերությունները վատթարացել են նաև «Դրուժբա» նավթամուղի վրա ուկրաինական հարձակումների պատճառով, որի միջոցով Հունգարիան ռուսական նավթ է ստանում։ Հունգարիայի արտաքին գործերի նախարարությունը Կիևին մեղադրում է երկրի «էներգետիկ անվտանգության նկատմամբ ոտնձգության» մեջ։
Թարգմանությունը՝ Էմմա Չոբանյանի
