Քաղաքականություն
27.08.2025 | 17:17
Թբիլիսիի քաղաքային դատարանը, Գլխավոր դատախազության պահանջով, սառեցրել է բողոքի ցույցերը ֆինանսավորելու մեջ մեղադրվող յոթ ոչ կառավարական կազմակերպությունների բանկային հաշիվները, գրում է Current time-ը։
Դատարանի որոշմամբ արգելափակվել են հետևյալ ՀԿ-ների հաշիվները՝ Քաղաքացիական հասարակության հիմնադրամ, Արդար ընտրությունների և ժողովրդավարության միջազգային ընկերություն (ISFED), Տեղեկատվության ազատության զարգացման ինստիտուտ (IDFI), Ժողովրդավարության պաշտպաններ, Վրացական ժողովրդավարության նախաձեռնություն (GDI), Սապարի, Սոցիալական արդարադատության կենտրոն։
Գլխավոր դատախազությունը հայտարարել է, որ հաշիվների արգելափակումը կապված է սաբոտաժի, ծանրացուցիչ հանգամանքներում սաբոտաժի փորձի, օտարերկրյա կազմակերպության և օտարերկրյա կառույցների կողմից վերահսկվող կազմակերպության գործունեությանն օժանդակելու, ինչպես նաև երկրի սահմանադրական կարգի և ազգային անվտանգության դեմ ուղղված գործունեության համար ֆինանսավորման մոբիլիզացման գործի քննության հետ։
Նշվում է, թե այս յոթ կազմակերպությունները ցուցարարների համար գնել են հատուկ գազային դիմակներ, պաշտպանիչ ակնոցներ, դիմակներ, պղպեղի սփրեյ և այլ սարքավորումներ, որոնք ցուցարարներն ակտիվորեն օգտագործել են «ոստիկանության հետ բախումների ժամանակ»։ Բացի այդ, ՀԿ-ների ղեկավարները, Դատախազության պնդմամբ, «բացահայտորեն կոչ են արել հանրությանը անհնազանդություն և դիմադրություն ցուցաբերել, նրանց կազմակերպչական և ֆինանսական գործունեությունն ամբողջությամբ ուղղված է եղել բռնի գործողություններին մասնակցող անձանց և նրանց ընտանիքների անդամների ֆինանսական պաշտպանությանը»։
«Տուգանքները վճարվել են խախտողների օգտին, պաշտպանության ծախսերը հոգացել են, լուծվել են այլ անձնական և կազմակերպչական հարցեր։ Ձեռնարկված գործողությունների նպատակն էր, մի կողմից, խրախուսել անօրինական գործողություններին մասնակցող անձանց, մյուս կողմից՝ պաշտպանել այդ անձանց։ Վերջին հաշվով, համակարգված գործողությունները նպատակ ունեին թուլացնել իրավապահ մարմիններին և խաթարել նրանց բնականոն աշխատանքը»,- ասվում է գերատեսչության հաղորդագրության մեջ։
Հավելենք, որ 2024 թվականի նոյեմբերի վերջին Վրաստանի իշխանությունները հայտարարեցին, որ դադարեցնում են ԵՄ անդամակցության բանակցությունները մինչև 2028 թվականը, ինչը լայնածավալ բողոքի ցույցեր առաջացրեց ամբողջ երկրում: Լեհաստանը, Գերմանիան և Ֆրանսիան դատապարտել են խաղաղ ցուցարարների, լրատվամիջոցների ներկայացուցիչների և ընդդիմության առաջնորդների նկատմամբ բռնությունը, ինչպես նաև քաղաքական գործիչների նկատմամբ սպառնալիքները:
Արևմտյան մի շարք երկրներ, այդ թվում՝ Լատվիան, Լիտվան և Էստոնիան, պատժամիջոցներ են կիրառել ցուցարարների նկատմամբ բռնության համար պատասխանատուների նկատմամբ:
Թարգմանությունը՝ Էմմա Չոբանյանի
