22.05.2026 | 22:00
Իշխանությունը հերքում է, ընդդիմությունը՝ պնդում. «300 հազար ադրբեջանցիների» թեման և նախընտրական քարոզարշավը․ ՏԵՍԱՆՅՈՒԹ
Պեսկովը՝ Չինաստանում Պուտինի և Ալիևի հնարավոր հանդիպման մասին
Քաղաքականություն
27.08.2025 | 15:40
Կրեմլը չի բացահայտում՝ արդյո՞ք Չինաստանում կայանալիք Շանհայի համագործակցության կազմակերպության գագաթնաժողովի շրջանակում նախատեսված է Ռուսաստանի նախագահ Վլադիմիր Պուտինի և Ադրբեջանի նախագահ Իլհամ Ալիևի հանդիպումը, փոխանցում է Ինտերֆաքսը։
«Մենք այժմ պատրաստում ենք երկկողմ հանդիպումների ժամանակացույցը, այն պետք է ներառվի մեր չինացի ընկերների կողմից կազմակերպվելիք միջոցառումներում, դրանից հետո արդեն ձեզ կտեղեկացնենք»,- ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով այն հարցին՝ արդյո՞ք Պուտինը ծրագրում է հանդիպել Ալիևի հետ ՇՀԿ գագաթնաժողովի շրջանակում, որին ներկա են լինելու երկու նախագահները։
«Պուտինն այժմ ակտիվորեն պատրաստվում է Վլադիվոստոկում կայանալիք Հեռավոր Արևելքի տնտեսական ֆորումին։ Մինչ այդ, տեղի կունենա Պուտինի աննախադեպ այցը Չինաստան, որի նախապատրաստական աշխատանքները ներկայում ընթացքի մեջ են»,- հավելել է Կրեմլի խոսնակը։
Հավելենք, որ Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել էր ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ադրբեջանի Գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից իր քաղաքացիների խոշտանգումների և սպանության փաստով։
Ադրբեջանի նախագահ Իլհամ Ալիևն էլ Al Arabiya-ին տված հարցազրույցում հայտարարել է, որ Բաքուն չի կրում պատասխանատվությունը ՌԴ-ի հետ հարաբերությունների վատթարացման համար։
Թարգմանությունը՝ Էմմա Չոբանյանի
