04.11.2026 | 13:20
NYMEX. Ոսկու, արծաթի ու պլատինի գները նվազել են
Քաղաքապետարանը տուգանում է, ուղևորները՝ դժգոհում․ մեկ շաբաթում ավելի քան 200 քաղաքացի է տուգանվել․ ՏԵՍԱՆՅՈՒԹ
Հասարակություն
26.08.2025 | 18:30
Երևանի քաղաքապետարանի հասարակական կարգի պահպանության ծառայության աշխատակիցները հատուկ սարքերով ստուգում են՝ արդյո՞ք քաղաքացիները վճարել են ուղեվարձը, օգտագործում են սեփակա՞ն, թե՞ արտոնության խմբում ներառված մեկ այլ քաղաքացու քարտ, արդյո՞ք վճարումը կատարել են մեկ րոպեի ընթացքում։ Տեսուչները հասարակական կարգի պահպանության ծառայության աշխատակիցներ են, նրանց թիվն այնքան էլ մեծ չէ՝ 47, իսկ սարքերն ավելի քան երեսունն են։ Մեր նկարահանման ընթացքում ուղևորներից մեկը պնդում էր, որ նստելիս վճարել է, սակայն սարքը հակառակն արձանագրեց։
Ուղևորներն ուղեվարձը չվճարելը հիմնավորում էին տրանսպորտի վատ աշխատանքով։ Ի պատասխան՝ քաղաքապետարանի պաշտոնյան պատճառաբանեց՝ երթևեկության «պիկ» ժամ է, դրանով է պայմանավորված, որ ուղևորների մի մասը կանգնած է երթևեկում, այնինչ ժամը 15։00 էր, որը, կարծես, «պիկ» ժամ չի համարվում։
Այն դեպքերում, երբ QR կոդը հավելվածում չի երևում, տվյալները Երևանի կառավարման տեխնոլոգիաների կենտրոնից են փոխանցում՝ ասաց Երևանի քաղաքապետարանի աշխատակազմի հասարակական կարգի պահպանության ծառայության պետի պաշտոնակատար Ավետիք Բաբայանը։
«Եթե վստահ ենք, որ այլևս խնդիր չունենք, կարծում եմ՝ պետք է համապատասխան վարչարարությունը կիրառել»,- օգոստոսի 18-ի գործակարգավարական խորհրդակցությանն ասաց Տիգրան Ավինյանը։
Քաղաքապետի այդ հայտարարությունից մեկ շաբաթ անց տրանսպորտի ուղեվարձը չվճարելու համար տուգանվել է 252 քաղաքացի, որից 145-ը՝ ուղավարձը չվճարելու, 34-ը՝ արտոնություն ունեցող այլ անձի քարտով վճարելու, 73-ը՝ հսկիչների հորդորից հետո վճարելու համար։
Քաղաքացիների մոտեցումները տուգանելու վերաբերյալ տարբեր են․ մի մասը դրանք անարդար է համարում, մյուսները՝ անհրաժեշտ։
Ավետիք Բաբայանի խոսքով՝ ստուգումները համատարած են, հատուկ ժամեր չկան։ Նա նաև վստահեցրեց՝ վերահսկողությունը շարունակական է լինելու։
Մանրամասները՝ տեսանյութում։
Արփի Հակոբյան
