Իսրայելում գերիների հարազատները գործարք են պահանջում ՀԱՄԱՍ-ի հետ

Իսրայելցի գերիների հարազատները, որոնք շարունակում են մնալ պաղեստինցի իսլամիստների՝ ՀԱՄԱՍ ահաբեկչական կազմակերպության ձեռքում, բողոքի ցույցեր են անցկացրել Իսրայելի կառավարության վեց անդամների մասնավոր տների մոտ, այդ թվում՝ երկրի պաշտպանության նախարար Իսրայել Կացի և ԱԳ նախարար Գիդեոն Սաարի տան մոտ, հայտնում է dpa գործակալությունը կիրակի՝ օգոստոսի 24-ին։

Ցուցարարները կոչ են արել նախարարներին հաստատել հրադադար Գազայի հատվածում և գործարք կնքել ՀԱՄԱՍ-ի զինյալների հետ՝ գերիների ազատ արձակման համար․ «Մենք չենք ների հետագա ձգձգումը։ Լսեք ժողովրդին․ կանգնեցրեք այս պատերազմը և վերադարձրեք բոլորին տուն»։

Օգոստոսի 18-ին AFP գործակալությունը ՀԱՄԱՍ-ի աղբյուրների հղումով հաղորդեց, որ նրանք ընդունել են Գազայում հրադադարի նոր առաջարկը։ Ըստ աղբյուրի՝ խոսքը 60-օրյա հրադադարի և ՀԱՄԱՍ-ի կողմից պահվող գերիների երկու փուլով ազատ արձակման մասին է։

Ենթադրվում է, որ ահաբեկիչների ձեռքում գտնվող 50 իսրայելցի գերիներից կենդանի են մնացել 20-ը։ Իսրայելի իշխանությունները դեռևս պաշտոնապես չեն հաստատել, որ համաձայն են հրադադարի առաջարկին։

Ավելի վաղ՝ օգոստոսի 17-ին, մի քանի հարյուր հազար մարդ Թել Ավիվում մասնակցել էր հանրահավաքին՝ պահանջելով Իսրայելի կառավարությունից գործարք կնքել ՀԱՄԱՍ-ի հետ գերիների ազատ արձակման համար։ Կանխատեսվում է, որ հերթական հակակառավարական ցույցը կանցկացվի օգոստոսի 26-ին։

Հիշեցնենք՝ օգոստոսի 8-ին Իսրայելի անվտանգության կաբինետը հաստատել էր ՀԱՄԱՍ շարժման «խորտակման» և Գազա քաղաքի վրա Իսրայելի պաշտպանության բանակի (ՑԱՀԱԼ) վերահսկողություն հաստատելու պլանը։ Որոշումը կայացվել էր գիշերային խորհրդակցության ժամանակ՝ չնայած պատերազմի դադարեցման միջազգային կոչերին, Իսրայելում շատերի բողոքներին, ովքեր անհանգստանում են ՀԱՄԱՍ-ի մոտ պահվող գերիների ճակատագրով, ինչպես նաև ընդդիմության քննադատությանը։

ՑԱՀԱԼ-ը բազմիցս ավիահարվածներ է հասցրել Գազա քաղաքին և ներխուժումներ իրականացրել այնտեղ։ Սակայն մինչ այդ այն մնացել էր այն քիչ տարածքներից մեկը, որը չէր վերածվել իսրայելական բուֆերային գոտու և չէր ենթարկվել տարհանման։

Մերձավոր Արևելքում իրավիճակը կտրուկ սրվեց 2023 թվականի հոկտեմբերի 7-ին, երբ ԵՄ-ում և ԱՄՆ-ում ահաբեկչական ճանաչված ՀԱՄԱՍ շարժումը զանգվածային հարձակում գործեց Իսրայելի վրա։ Զինյալները զանգվածային հրթիռային հարված հասցրին Իսրայելին, ներխուժեցին նրա տարածք և իրականացրին ժամանակակից Իսրայելի պատմության մեջ ամենախոշոր սպանդը խաղաղ բնակչության շրջանում՝ սպանելով մոտ 1200 մարդու։ Նրանք նաև գերեվարեցին ավելի քան 250 հոգու և տարան Գազայի հատված։ Գերեվարվածների մի մասը փոխանակվել կամ ազատ է արձակվել, մյուս մասը սպանվել է։

Ի պատասխան՝ Իսրայելը պատերազմ հայտարարեց ՀԱՄԱՍ-ին։ Գազայի հատվածում զոհվել է ավելի քան 62 հազար պաղեստինցի, ևս շուրջ 157 հազար մարդ վիրավորվել է, հայտնում է ՀԱՄԱՍ-ի վերահսկողության տակ գտնվող առողջապահության նախարարությունը։ Սակայն այն չի պարզաբանում, թե ինչպես է կազմվում այդ վիճակագրությունը՝ մասնավորապես, քանի՞ իսլամիստ զինյալներ են եղել զոհերի թվում և արդյոք հաշվի առնվում են հիվանդանոցներում գտնվող պաղեստինցիների բնական մահվան դեպքերը։