12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Թրամփը հայտարարել է, որ Զելենսկիի և Պուտինի հանդիպման նախապատրաստական աշխատանքներ է սկսել
Քաղաքականություն
19.08.2025 | 10:27
Ուկրաինայի նախագահի ու եվրոպացի առաջնորդների հետ հանդիպումից հետո ԱՄՆ նախագահ Դոնալդ Թրամփը հայտարարել է, որ սկսել է Վլադիմիր Զելենսկիի և ՌԴ նախագահ Վլադիմիր Պուտինի հանդիպման նախապատրաստական աշխատանքները: Այս մասին նա հայտնել է Truth սոցիալական ցանցում։
«Մենք քննարկել ենք Ուկրաինայի անվտանգության երաշխիքները, որոնք կտրամադրեն տարբեր եվրոպական երկրներ՝ Միացյալ Նահանգների հետ համակարգված: Բոլորը շատ ոգևորված են Ռուսաստանի և Ուկրաինայի միջև խաղաղության հաստատման հնարավորությամբ: Հանդիպումներից հետո ես զանգահարել եմ նախագահ Պուտինին և սկսել եմ նախագահ Պուտինի և նախագահ Զելենսկիի հանդիպման նախապատրաստական աշխատանքները՝ որոշվելիք վայրում»,- գրել է նա, փոխանցում է Current time-ը։
Այս հանդիպումից հետո, ըստ Թրամփի, նախատեսում է եռակողմ գագաթնաժողով անցկացնել՝ իր մասնակցությամբ։
Թրամփը հավելել է՝ ԱՄՆ փոխնախագահ Ջեյ Դի Վենը, պետքարտուղար Մարկո Ռուբիոն և իր հատուկ դեսպանորդ Սթիվ Ուիթկոֆը «համակարգում են աշխատանքները Ռուսաստանի և Ուկրաինայի հետ»։
Գերմանիայի կանցլեր Ֆրիդրիխ Մերցը հայտարարել է, որ Զելենսկիի և Պուտինի միջև հանդիպումը «նախատեսվում է հաջորդ երկու շաբաթվա ընթացքում»։
Axios-ի թղթակից Բարաք Ռավիդն իր հերթին, հղում անելով տեղեկացված աղբյուրին, գրել է, որ Սպիտակ տունը հույս ունի Զելենսկի-Պուտին հանդիպում անցկացնել մինչև օգոստոսի վերջը։
Վլադիմիր Զելենսկին հայտարարել է՝ անվտանգության երաշխիքները հիմնական հարցն են լայնածավալ պատերազմի ավարտից առաջ։
