Քաղաքականություն
14.08.2025 | 13:10
Ռուսական հատուկ ծառայությունները պնդում են, որ ռուս զինծառայողներն Ուկրաինայում ոչնչացրել են «Սապսան» հրթիռների չորս արտադրական օբյեկտ՝ երկուական՝ Դնեպրոպետրովսկում և Սումիի մարզում, գրում է BBC-ի ռուսական ծառայությունը։
«Գործողության հետևանքով Ուկրաինայի ռազմարդյունաբերական համալիրին հասցված վնասը հսկայական է և անհամեմատելի Ուկրաինայի պաշտպանության նախարարության գլխավոր հետախուզական վարչության կողմից անցկացված «Սարդոստայն» գործողության հետևանքով Ռուսաստանին հասցված վնասի հետ», – ասվում է ՌԴ ԱԴԾ-ի հայտարարությունում։
Չի նշվում, սակայն, թե երբ է տեղի ունեցել։ Ուկրաինական կողմը դեռևս չի մեկնաբանել ԱԴԾ-ի հայտարարությունը։
«Սապսան» հեռահար բալիստիկ հրթիռները նախատեսված են մինչև 500-700 կմ հեռավորության վրա թիրախներ խոցելու համար։
ԱԴԾ-ի կողմից հիշատակված «Սարդոստայն» գործողությունը ուկրաինական հատուկ ծառայություններն իրականացրել էին հունիսի 1-ին։ Նրանք զանգվածային անօդաչու թռչող սարքերով հարվածել էին ռուսական չորս ավիաբազաների՝ ոչնչացնելով կամ շարքից հանելով մինչև 41 ռազմավարական ինքնաթիռ (ըստ ԱԴԾ-ի գնահատականների)։
