Թրամփը Զելենսկիին խոստացել է Պուտինի հետ Ուկրաինայի տարածքների բաժանման հարց չքննարկել

ԱՄՆ նախագահ Դոնալդ Թրամփը  օգոստոսի 15-ին ՌԴ նախագահ Վլադիմիր Պուտինի հետ հանդիպման ժամանակ Ուկրաինայի տարածքների բաժանման հարց չի քննարկի։ Այս մասին ասել է Ուկրաինայի նախագահ Վլադիմիր Զելենսկիի ու եվրոպացի առաջնորդների հետ առցանց հանդիպման ժամանակ, NBC News-ին և CNN-ին հայտնել են տեղեկացված աղբյուրները։

Ըստ Moscow Times-ի՝ աղբյուրներն ասել են, որ Թրամփը վստահեցրել է՝ պատրաստվում է ձգտել անվերապահ հրադադարի։ Սպիտակ տան ղեկավարն ու եվրոպացի առաջնորդները նաև համաձայնել են, որ խաղաղության բանակցությունները կարող են սկսվել միայն հրադադարի հաստատումից հետո, և Ուկրաինան պետք է մասնակցի տարածքների ապագայի և խաղաղության պայմանների քննարկմանը։

Միաժամանակ, որոշ եվրոպացի առաջնորդների մոտ տպավորություն է ստեղծվել, որ Թրամփը «չափազանց լավատես չէ Պուտինի հետ հանդիպման արդյունքների վերաբերյալ»։

Նախկինում ԱՄՆ նախագահի վարչակազմում աշխատած անանուն պաշտոնյան էլ CNN-ի հետ զրույցում ընդգծել է, որ Թրամփը «նախընտրում է դաշնակիցներին պահել իր կողքին», և Ռուսաստանի նախագահի հետ հանդիպման ժամանակ «ամեն ինչ կարող է պատահել»։

Նախօրեին Դոնալդ Թրամփը սպառնացել էր «շատ լուրջ հետևանքներով», եթե Պուտինը իր հետ բանակցությունների ընթացքում չհամաձայնվի հրադադարի։ Ամերիկացի առաջնորդը հավելել է, որ եթե «Պուտինից չստանա իրեն անհրաժեշտ պատասխանները», հաջորդ հանդիպումը տեղի չի ունենա։ Սակայն եթե բանակցությունները հաջող լինեն, Սպիտակ տան ղեկավարը չի բացառել եռակողմ հանդիպումը Ուկրաինայի նախագահ Վլադիմիր Զելենսկիի մասնակցությամբ, որը կարող է տեղի ունենալ արդեն հաջորդ շաբաթ։