19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Արարատ Միրզոյանը հեռախոսազրույց է ունեցել Սերգեյ Լավրովի հետ
Քաղաքականություն
11.08.2025 | 19:21
ՌԴ արտաքին գործերի նախարար Սերգեյ Լավրովը հեռախոսազրույց է ունեցել ՀՀ արտաքին գործերի նախարար Արարատ Միրզոյանի հետ՝ հայկական կողմից նախաձեռնությամբ, հաղորդում է ՌԴ ԱԳՆ մամուլի ծառայությունը։
«ՀՀ արտաքին գործերի նախարարության ղեկավարը տեղեկացրել է ՀՀ վարչապետ Նիկոլ Փաշինյանի, ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի միջև տեղի ունեցած շփումների մանրամասների մասին։ Սերյեգ Լավրովն ընդգծել է Բաքվի ու Երևանի միջև կայուն խաղաղության հասնելու կարևորությունը՝ համաձայն Ռուսաստանի կենտրոնական դերակատարմամբ 2020-2022 թվականների ամենաբարձր մակարդակով ձեռք բերված եռակողմ համաձայնագրերի։ Նշվել է Մոսկվայի պատրաստակամությունը՝ շարունակել նպաստել Ադրբեջանի և Հայաստանի միջև հարաբերությունների համապարփակ կարգավորմանը»,- ասվում է հաղորդագրությունում։
Քննարկվել են նաև ռուս-հայաստանյան օրակարգի որոշ արդիական հարցեր։
ՀՀ ԱԳՆ-ն էլ հեռախոսազրույցի վերաբերյալ հաղորդագրություն է տարածել, որում ասվում է.
«Ի շարունակություն երկու երկրների միջև կայացած զրույցի, Արարատ Միրզոյանը ՌԴ իր գործընկերոջն է ներկայացրել օգոստոսի 8-ին Վաշինգտոնում ձեռք բերված համաձայնությունները, մասնավորապես Հայաստանի և Ադրբեջանի միջև խաղաղության պայմանագրի նախաստորագրումը, ԵԱՀԿ Մինսկի գործընթացի և առնչվող կառույցների լուծարման վերաբերյալ համատեղ դիմումը, ինչպես նաև ընդգծել տարածաշրջանային հաղորդակցությունների ապաշրջափակման հարցում վերահաստատված հիմնարար սկզբունքները:
Նախարար Միրզոյանը շնորհակալություն է հայտնել այս կարևոր հանգրվանի կապակցությամբ ՌԴ ԱԳ նախարարի շնորհավորանքի և աջակցության համար:
Զրուցակիցները նաև անդրադարձ են կատարել ՀՀ և ՌԴ միջև երկկողմ համագործակցության հարցերի»:
