06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Al Jazeera-ն հաղորդում է Գազայի ուղղությամբ հարվածի հետևանքով իր հինգ աշխատակցի մահվան մասին
Քաղաքականություն
11.08.2025 | 10:18
Կատարի Al Jazeera հեռուստաալիքը հաղորդում է իր հինգ աշխատակցի մահվան մասին Գազա քաղաքի վրա Իսրայելի հարվածի հետևանքով: Զոհերը լրագրողներ Անաս ալ-Շարիֆն ու Մոհամմեդ Քրեյքեն են, ինչպես նաև երեք օպերատոր՝ Իբրահիմ Զահերը, Մոհամմադ Նուֆալը և Մաոմեն Ալիուան։
Նշվում է, որ ռմբակոծության պահին նրանք եղել են «Ալ-Շիֆա» հիվանդանոցի մոտ գտնվող լրագրողների համար նախատեսված վրանում: Հարվածը հասցվել է անօդաչու թռչող սարքի միջոցով:
Ընդհանուր առմամբ, իսրայելական հարվածի հետևանքով յոթ մարդ է զոհվել։
Իր հերթին, Իսրայելի բանակը հայտարարել է, որ ոչնչացրել է «ահաբեկիչ Անաս ալ-Շարիֆին, որը ներկայանում էր որպես Al Jazeera հեռուստաալիքի լրագրող»: Իսրայելցի զինվորականների խոսքով՝ նա ղեկավարել է պաղեստինյան ՀԱՄԱՍ-ի ստորաբաժանումներից մեկը և «պատասխանատու է եղել իսրայելցի քաղաքացիական անձանց և զինվորների վրա հրթիռային հարձակումների համար»:
Հեռուստաալիքի տվյալներով՝ իր աշխատակիցները ներառվել են այն 48 պաղեստինցիների ցուցակում, որոնք վերջին 24 ժամվա ընթացքում Գազայի հատվածում Իսրայելի գործողությունների զոհ են դարձել:
Օգոստոսի 5-ին անկլավի իշխանությունները հայտնել էին, որ Գազայում սպանված լրագրողների թիվը գերազանցել է 230-ը:
