05.11.2026 | 00:08
Ինչ է որոշել ընդդիմությունը. Նարեկ Կարապետյանը հանդիպումից հետո մանրամասներ հայտնեց. ՏԵՍԱՆՅՈՒԹ
500 հազար դոլարի ավանդ՝ «Արդշինբանկ»-ում․ ինչ է հայտարարագրել Մհեր Գրիգորյանը
Տնտեսություն
07.08.2025 | 12:20
ՀՀ փոխվարչապետ Մհեր Գրիգորյանն անցած տարի վաճառել է «Արդշինբանկ» ՓԲԸ-ի իր պարտատոմսերը, որոնք 511 հազար 700 դոլարով ձեռք էր բերել 2023-ին։ Միաժամանակ, նա 500 հազար դոլարի ավանդ է դրել «Արդշինբանկ»-ում։
Գրիգորյանը եկամուտ ստացել է 2 աղբյուրից՝ վարչապետի աշխատակազմից՝ 24․3 մլն դրամ աշխատավարձ, և «Արդշինբանկ»-ից՝ 24․2 հազար դոլար այլ եկամուտներ, 17․9 հազար դրամ ավանդի դիմաց տոկոս և ևս 125․7 հազար դրամ այլ եկամուտ։
Փոխվարչապետի բանկայի հաշվի մնացորդը տարեվերջին կազմել է 7 մլն դրամ։ Տարվա ընթացքում նրա կանխիկ միջոցները պակասել են 20 մլն դրամով՝ տարեվերջին կազմելով 50 մլն դրամ։
Գրիգորյանի անշարժ գույքի կազմն ու քանակը չի փոփոխվել․ նա հայտարարագրել է Երևանի կենտրոնում 1 բնակարան և 2 ավտոտնակ, առանձնատուն և հողամաս Աշտարակում։ Չնայած 2 ավտոտնակների առկայությանը՝ Գրիգորյանն ավտոմեքենա չունի։ Այս բոլոր գույքերը համատեղ սեփականություն են։
Փոխվարչապետի կինը՝ Աննա Գրիգորյանը, բացի համատեղ գույքերից, միանձնյա առանձնատուն ունի Աջափնյակում (գնել է 2023-ին) և բնակարան Երևանի Կենտրոնում (նվիրատվություն է ստացել 2007-ին)։
Աննա Գրիգորյանը նույնպես բանկային ավանդ ունի «Արդշինբանկ»-ում․ այն տարվա ընթացքում պակասել է 100 հազար դոլարով՝ տարեվերջին կազմելով 500 հազար դոլար։
Փոխվարչապետի տիկնոջ բանկային հաշիվներին տարեվերջին եղել է 22․8 հազար դոլար, մոտ 14 մլն դրամ և 2․74 եվրո։ Աննա Գրիգորյանի տարեկան եկամուտը 2024-ին 7․2 մլն դրամ է եղել, որից 7․2 հազար դոլարն ավանդի դիմաց տոկոս է, 11․5 հազար դոլարը՝ այլ եկամուտ «Արդշինբանկ»-ից։ Նա 33․5 մլն դրամ է ծախսել անշարժ գույքի վերանորոգման համար։
Գրիգորյանների դուստրը՝ Եվա Գրիգորյանը, որ Կենտրոնական բանկում հասարակայնության հետ կապերի ծառայության մասնագետ է, 2024-ին ստացել է 3․7 մլն դրամ աշխատավարձ։ Նա անշարժ գույք չունի, ունի միայն MERCEDES-BENZ մակնիշի ավտոմեքենա։
Գայանե Խաչատրյան
