Կուբանում ԱԹՍ-ների հարձակումից հետո հրդեհ է բռնկվել զորամասում ու նավթավերամշակման գործարանում․ ՏԵՍԱՆՅՈՒԹ

ՌԴ Պաշտպանության նախարարությունը հայտնել է վեց շրջաններում, բռնակցված Ղրիմում, Սև ու Ազովի ծովերում 72 անօդաչու թռչող խոցելու մասին, գրում է Current time-ը։

Գերատեսչության տվյալներով՝ Կրասնոդարի երկրամասի տարածքում խոցվել է ինը անօդաչու թռչող սարք։ Մարզի նահանգապետ Վենիամին Կոնդրատևը հայտնել է, որ Կուբանի Սլավյանսկում անօդաչու թռչող սարքի բեկորների ընկնելու հետևանքով վիրավորվել է մեկ տղամարդ, կոտրվել են մասնավոր տան պատուհանները, իսկ օժանդակ շինությունը՝ ավերվել։

Astra-ն, հղում անելով տեղի բնակիչներին, գրում է, որ հրդեհ է բռնկվել 61661 զորամասում։ Բացի այդ, Astra-ի տվյալներով՝ Կրասնոդարի երկրամասում հրդեհ է բռնկվել Աֆիպսկիի նավթավերամշակման գործարանի վրա ԱԹՍ-ների հարձակումից հետո։ Կոնդրատևն իր հաղորդագրության մեջ այդ մասին չի հիշատակում։

Կրասնոդարի երկրամասի ղեկավարի խոսքով՝ Կրասնոարմեյսկի շրջանում անօդաչու թռչող սարքի բեկորների անկումից հետո փոքր հրդեհներ են բռնկվել, որոնք արագորեն մարվել են։

Վոլգոգրադի մարզում էլ յոթ անօդաչու թռչող սարք է խոցվել, հայտնել է ՌԴ ՊՆ-ն։

Մարզի նահանգապետ Անդրեյ Բոչարովը հայտնել է, որ Սուրովիկինո երկաթուղային կայարանի վարչական շենքում հրդեհ է բռնկվել, իսկ անօդաչու թռչող սարքի բեկորներն ընկել են Մաքսիմ Գորկի երկաթուղային կայարանի վրա։ Երկաթուղային տրանսպորտը գործում է բնականոն ռեժիմով։

Ռուսաստանի ՊՆ-ի տվյալներով՝ Ազովի ծովի ջրերի վրա խոցվել է 31 անօդաչու թռչող սարք, 11-ը՝ բռնակցված Ղրիմի, 10-ը՝ Ռոստովի մարզի, 8-ը՝ Սև ծովի, 4-ը՝ Բելգորոդի մարզի և մեկական՝ Կուրսկի և Օրյոլի մարզերի վրա։

Թարգմանությունը՝ Էմմա Չոբանյանի