Ռուսաստանը հիմա ավելի հակված է հրադադարին. Զելենսկի

ԱՄՆ նախագահի հատուկ բանագնացչ Սթիվ Ուիթկոֆի հետ բանակցությունների ժամանակ Ռուսաստանը ցույց է տվել, որ այժմ ավելի հակված է Ուկրաինայի հետ հրադադարին, գրում է ՌԲԿ Ուկրաինան։

Նա հիշեցրել է, որ Ուիթկոֆի Մոսկվա այցից հետո ինքը զրուցել է ԱՄՆ նախագահ Դոնալդ Թրամփի հետ։ Զրույցին մասնակցել են նաև եվրոպացի առաջնորդներ։

«Մենք քննարկել ենք այն, ինչ հնչել է Մոսկվայում։ Թվում է, թե Ռուսաստանն այժմ ավելի հակված է կրակը դադարեցնելուն։ Նրանց վրա ճնշումնաշխատում է։ Բայց գլխավորն այն է, որ նրանք մանրամասներում չխաբեն մեզ կամ Միացյալ Նահանգներին»,- ընդգծել է Զելենսկին։

Ըստ նրնա՝ Ուկրաինան առաջարկել է իր գործընկերներին մոտ ապագայում անցկացնել անվտանգության խորհրդականների հանդիպում՝ ընդհանուր դիրքորոշումը և ընդհանուր տեսակետը համաձայնեցնելու համար։

«Ուկրաինան անպայման կպաշտպանի իր անկախությունը, մեզ բոլորիս անհրաժեշտ է երկարատև և հուսալի խաղաղություն։ Ռուսաստանը պետք է դադարեցնի իր սկսած պատերազմը»,- հավելել է Ուկրաինայի ղեկավարը։

Հիշեցնենք, որ ԱՄՆ նախագահի հատուկ բանագնաց Սթիվ Ուիթկոֆն օգոստոսի 6-ին Մոսկվայում հանդիպել է ՌԴ նախագահ Վլադիմիր Պուտինի հետ։ Դոնալդ Թրամփը հայտարարել է, որ նրանց միջև բանակցությունների ընթացքում զգալի առաջընթաց է գրանցվել։ Պուտին-Ուիթկոֆ հանդիպումից հետո Թրամփն ու Զելենսկին հեռախոսազրույց են ունեցել։

Միևնույն ժամանակ, Reuters-ը, հղում անելով Սպիտակ տան աղբյուրին, գրել է, որ չնայած բանակցությունների հաջողությանը՝ ԱՄՆ-ը ծրագրում է երկրորդական պատժամիջոցներ կիրառել Ռուսաստանի դեմ։ Դա կարող է տեղի ունենալ ուրբաթ՝ օգոստոսի 8-ին։

Թարգմանությունը՝ Էմմա Չոբանյանի