31.07.2026 | 00:19
Կոնֆերենցիաների լիգա. «Ալաշկերտը» 10 ֆուտբոլիստով պարտվեց «Կլուժին»
Հայաստանում ձերբակալվել է Տաջիկստանի ընդդիմադիր «Խումբ 24»-ի անդամ Իսմայիլ Խոլովը
Հասարակություն
06.08.2025 | 17:55
Տաջիկստանի նախագահին ընդդիմադիր «Խումբ 24»-ի անդամ Իսմայիլ Խոլովը ձերբակալվել է Հայաստանում: Այս մասին հայտնել է «Ազատություն» ռադիոկայանի տաջիկական ծառայությունը, փոխանցում է Current time-ը:
Նա ձերբակալվել է Հայաստանի և Վրաստանի սահմանին: Բագրատաշենի սահմանային անցակետի ներկայացուցիչը հայտնել է, որ Խոլովը ձերբակալվել է, քանի որ Տաջիկստանի իշխանությունները նրա նկատմամբ հետախուզում են հայտարարել:
«Նրա գործը ներկայում քննվում է, դեռևս պարզ չէ, թե ինչպիսին կլինի հաջորդ որոշումը։ Դատարանը կորոշի ամեն ինչ»,- ասել է նա։
Այլ մանրամասներ հայտնի չեն։ Լրագրողները չեն կարողացել կապ հաստատել անձամբ Խոլովի հետ:
Տաջիկստանում 44-ամյա Իսմայիլ Խոլովի դեմ քրեական գործ է հարուցվել արգելված կազմակերպությանը մասնակցելու համար։ Նա 2011 թվականից բնակվել է Ռուսաստանում, սակայն 2023 թվականին լքել է այն՝ Տաջիկստանի կողմից ակտիվիստների և ընդդիմադիրների նկատմամբ հետապնդումների աճի պատճառով։ Վերջին տարիներին Ռուսաստանը պարբերաբար նրանց արտահանձնում է Դուշանբեին։
2015 թվականին նա Դուշանբեի խնդրանքով ձերբակալվել է Ռուսաստանում, վեց ամիս անցկացրել կալանքի տակ, սակայն, ի վերջո, Ռուսաստանը հրաժարվել է նրան արտահանձնել Տաջիկստանին։
Ըստ «Մեմորիալի»՝ 2018 թվականին Ռուսաստանի Ներքին գործերի նախարարությունը չեղյալ է հայտարարել նրա բնակության թույլտվությունը՝ հղում անելով ԱԴԾ փաստաթղթին. հատուկ ծառայությունը փակել է նրա մուտքը երկիր մինչև 2057 թվականը, և նա պետք է արտաքսվեր Տաջիկստան։ Սակայն դա տեղի չի ունեցել, քանի որ մարդու իրավունքների պաշտպանները դիմել են Մարդու իրավունքների եվրոպական դատարան, որը պաշտպանել է նրա իրավունքները։
«Խումբ 24»-ը հասարակական, քաղաքական շարժում է, ստեղծվել է 2012 թվականին Մոսկվայում տաջիկ գործարար և ընդդիմադիր Ումարալի Կուվատովի կողմից, որը 2015 թվականի հունվարին սպանվել է Ստամբուլում։
Շարժման հայտարարված նպատակների թվում են Տաջիկստանի կառավարության կազմի փոփոխությունը, երկրում բոլոր քաղբանտարկյալների ազատ արձակումը, մարդու իրավունքների և ազատությունների հարգումը, ինչպես նաև «Ազգի առաջնորդի մասին» օրենքի չեղարկումը։
2014 թվականին Տաջիկստանի Գերագույն դատարանը շարժումը ճանաչել է որպես ծայրահեղական և արգելել դրա գործունեությունը երկրի տարածքում։
Թարգմանությունը՝ Էմմա Չոբանյանի
