12.01.2026 | 21:26
Չաբի Ալոնսոն հեռացվեց «Ռեալից»
Բաքվում Արցախի ղեկավարների շինծու գործերով նիստում ցուցմունք է տվել ականի պայթյունից «տուժած» AzTV-ի աշխատակիցը
Քաղաքականություն
31.07.2025 | 19:11
Բաքվի զինվորական դատարանում այսօր շարունակվում է Արցախի ղեկավարների ու տարբեր պաշտոնյաների դեմ հարուցված շինծու գործերով դատական նիստը՝ դատավոր Զեյնալ Աղաևի նախագահությամբ։ Ադրբեջանական լրատվամիջոցների հաղորդմամբ՝ նիստում կրկին, այսպես կոչված, «տուժողներ» են ցուցմունք տալիս։
Մասնավորապես, «տուժող» Էմին Մամեդովը հայտարարել է, թե ինքը Քարվաճառ է ուղարկվել որպես AzTV-ի (Ադրբեջանի պետական հեռուստաընկերություն) աշխատակից՝ նկարահանումների համար, իսկ 2021 թվականի հունիսի 4-ին, տրանսպորտային միջոցով երթևեկելիս, Քարվաճառի շրջանի Սուսուզլուգ գյուղում տեղի է ունեցել հակատանկային ականի պայթյուն։ Նա նշել է, որ միջադեպի հետևանքով զոհվել են AzTV-ի օպերատոր Սիրաջ Աբիշովը, Ադրբեջանի պետական լրատվական գործակալության (AZERTAC) թղթակից Մահերրամ Իբրահիմովը և Քարվաճառի շրջանի գործադիր իշխանության Սուսուզլուգ գյուղի վարչական տարածքային շրջանի ներկայացուցչի տեղակալ Արիֆ Ալիևը, իսկ չորս մարդ, այդ թվում՝ ինքը, ստացել են մարմնական վնասվածքներ։
Պատասխանելով պետական մեղադրողի հարցերին՝ Մամեդովը նշել է, թե այն ճանապարհը, որտեղ տեղի է ունեցել միջադեպը, ավելի վաղ օգտագործվել է իրենց կողմից։
«Ես կարծում եմ, որ ականը տեղադրվել է ավելի ուշ՝ դիվերսիայի արդյունքում»,- հավելել է նա։
Մամեդովը պատասխանել է նաև հայ գերիների հարցերին։
Հուլիսի 29-ի նախորդ նիստում դարձյալ, այսպես կոչված, «տուժողներ» էին ցուցմունք տվել։ Արցախի նախկին ԱԳ նախարար Դավիթ Բաբայանը հարցեր էր ուղղել «տուժողներից» մեկին:
Թարգմանությունը՝ Էմմա Չոբանյանի
