Բաքվում շինծու գործերով նիստում Դավիթ Բաբայանը հարցեր է ուղղել «տուժողներից» մեկին

Արցախի ղեկավարների, տարբեր պաշտոնյաների նկատմամբ հարուցված շինծու գործերով հերթական դատական նիստն է տեղի ունեցել  Բաքվի զինվորական դատարանում։ Նիստին մասնակցել են հայ գերիները, նրանց պաշտպանները, «տուժողների» մի մասը, նրանց իրավահաջորդներն ու ներկայացուցիչները, ինչպես նաև պետական մեղադրանքը պաշտպանող դատախազները, գրում են ադրբեջանական լրատվամիջոցները։

Դատավոր Զեյնալ Աղաևը , այսպես կոչված,«տուժողներին», որոնք առաջին անգամ են մասնակցել  դատավարությանը, ներկայացրել է  դատարանի կազմը, պետական մեղադրանքին աջակցող դատախազներին, թարգմանիչներին, նաև բացատրել օրենքով սահմանված իրավունքներն ու պարտականությունները։

Մասնավորապես, «տուժող» Թահիր Մահմուդովն իր ցուցմունքներում ասել է, որ 2021 թվականի հուլիսի 21-ին Իվանյանի շրջանում ականի պայթյունի հետևանքով ծանր վիրավորվել է։ Դեպքի պահին նա աշխատել է, որպես անվտանգության աշխատակից տվյալ տարածքում գործող ընկերություններից մեկում։

Մեկ այլ «տուժող»՝ Ամին Մուսաևը, հայտարարել է, թե 2020 թվականի Արցախյան 44-օրյա պատերազմի ժամանակ վիրավորում է ստացել, գերեվարվել հայկական զինված ուժերի կողմից։ Նրա ցուցմունքներից արդեն ներկայացրել ենք։

Արցախի նախկին ԱԳ նախարար Դավիթ Բաբայանը հարցրել է  Մուսաևին, թե ինչու նրան նոյեմբերի 8-ից 11-ը չեն տարել իր զինակիցները։

«Իմ զինակիցները զոհվել են։ Երբ ես վիրավորվեցի, կորցրեցի գիտակցությունս։ Իմ ողջ մնացած զինակիցները կարծել են, որ ես նահատակ եմ։ Պատերազմի ժամանակ անհնար է անմիջապես դուրս հանել նահատակներին և վիրավորներին»,-ասել է նա։

Դավիթ Բաբայանի մեկ այլ հարցին ի պատասխան՝ Մուսաևը նշել է, որ կորցրել է առողջությունը «Հայաստանում գերության մեջ գտնվելու ժամանակ»։ Ցուցմունք են տվել այլ «տուժողներ» ևս։

Հաջորդ դատական նիստը տեղի կունենա հուլիսի 31-ին։

Թարգմանությունը՝ Էմմա Չոբանյանի