07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Չեխիայում նույնպես ադրբեջանական աղտոտված նավթ է հայտնաբերվել
Քաղաքականություն
31.07.2025 | 14:51
Չեխիան Ադրբեջանից ստացել է 60 հազար խորանարդ մետր աղտոտված նավթ, որում օրգանական քլորի պարունակությունը գերազանցում է նորման: Այս մասին հայտնել է Czech News Agency-ն, որին վկայակոչում են ադրբեջանական լրատվամիջոցները։
«Mero ընկերության հետ համագործակցությամբ մենք գրեթե 60 հազար խորանարդ մետր ծավալով աղտոտված նավթը կպահեստավորենք Նելահոզևեշի կենտրոնական նավթամբարում և Կրալուպի նադ Վլտավայի վերամշակման գործարանի պահուստարաններում։ Հետագայում այս նավթն աստիճանաբար կխառնվի այլ մատակարարումների հետ՝ ճշգրիտ սահմանված համամասնությամբ՝ նոսրացման և հետագա անվտանգ մշակման համար»,- ասել է Orlen Unipetrol ընկերության ներկայացուցիչ Պավել Կայդլը։
Նրա խոսքով՝ միջադեպի հետաքննությունը ներկայում ընթացքի մեջ է։
«Դա չի ազդել մեր նավթավերամշակման գործարանների գործունեության կամ Չեխիա նավթի մատակարարումների վրա»,- հավելել է նա։
Չեխիան փորձ ունի աղտոտված նավթի մատակարարումների հետ կապված։ 2019 թվականին Ռուսաստանից «Դրուժբա» խողովակաշարով մատակարարումները դադարեցվել էին նույն պատճառով։ Նավթը «Դրուժբա» խողովակաշարով երկու ամիս չէր հոսում՝ խողովակաշարը մաքրելու անհրաժեշտության պատճառով։
Հիշեցնենք, որ օրերս ավստրիական OMV էներգետիկ խումբը հայտնել էր, որ օրգանական քլորիդով աղտոտվածություն է հայտնաբերել իր նավթավերամշակման գործարաններ մատակարարվող ադրբեջանական հում նավթի բեռներում։
Ավելի վաղ էլ հաղորդվել էր, որ Բաքու-Թբիլիսի-Ջեյհան խողովակաշարով տեղափոխվող ադրբեջանական նավթի որակն ընկել է, ինչի հետևանքով Azeri Light տեսակի նավթի գինը նվազել է։ Մի քանի արդյունաբերական աղբյուրներ Reuters-ին հայտնել են, որ Բաքու-Թբիլիսի-Ջեյհան խողովակաշարով տեղափոխվող ադրբեջանական հում նավթի որոշ բեռներում հայտնաբերվել է օրգանական քլորիդների բարձր մակարդակ, ինչը հանգեցրել է բեռնման խափանումների։
Թարգմանությունը՝ Էմմա Չոբանյանի
