29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Բաքու-Թբիլիսի-Ջեյհան խողովակաշարով տեղափոխվող ադրբեջանական նավթի որակը վատթարացել է․ Azeri Light նավթի գինը նվազել է
Քաղաքականություն
23.07.2025 | 20:39
Բաքու-Թբիլիսի-Ջեյհան խողովակաշարով տեղափոխվող ադրբեջանական նավթի որակն ընկել է, ինչի հետևանքով Azeri Light տեսակի նավթի գինը նվազել է: Reuters-ը հաղորդում է, որ հուլիսի 22-ին ադրբեջանական նավթի և Brent տեսակի նավթի միջև գնային տարբերությունը նվազել է՝ հասնելով չորս տարվա ընթացքում ամենացածր ցուցանիշին, փոխանցում են ադրբեջանական լրատվամիջոցները։
Երեքշաբթի մի քանի արդյունաբերական աղբյուրներ Reuters-ին հայտնել են, որ Բաքու-Թբիլիսի-Ջեյհան խողովակաշարով տեղափոխվող ադրբեջանական հում նավթի որոշ բեռներում հայտնաբերվել է օրգանական քլորիդների բարձր մակարդակ, ինչը հանգեցրել է բեռնման խափանումների։ Ադրբեջանի պետական նավթային ընկերությունը (SOCAR) չի արձագանքել մեկնաբանության խնդրանքին։
Azeri Light նավթը համարվում էր ամենաբարձր որակի՝ իր բաղադրության շնորհիվ, հետևաբար, վաճառվում էր միջինում 2-3 դոլարով (երբեմն՝ 3-4 դոլարով) ավելի թանկ, քան Brent տեսակի նավթը։ Այժմ Azeri Light-ի և Brent-ի գների տարբերությունը նվազագույնի է հասել՝ կազմելով ընդամենը 40-45 ցենտ։
Ըստ ադրբեջանական լրատվամիջոցների՝ Ադրբեջանի նավթի որակի վատթարացումը կարող է պայմանավորված լինել Բաքու-Թբիլիսի-Ջեյհան խողովակաշար ցածրորակ ղազախական նավթի ներարկմամբ։
Հայտնի է, որ վերջին տարիներին Ղազախստանը, որպես արտահանման այլընտրանքային ուղի, ավելացրել է Ադրբեջանին նավթի մատակարարումները։ Ավելի վաղ ադրբեջանական նավթի որակը չնվազեցնելու համար Ղազախստանում կամ Ռուսաստանում գնված նավթը հիմնականում ուղարկվում էր տեղական վերամշակման, և նույն ծավալի ադրբեջանական նավթը տեղափոխվում էր Բաքու-Թբիլիսի-Ջեյհան խողովակաշարով։ Սակայն վերջին տարիներին Ադրբեջանում նավթի արտադրությունը նվազում է, և SOCAR-ը, կարծես, սկսել է զիջումների գնալ որակի հարցում՝ արտահանման կայուն ծավալները պահպանելու համար։
Չորեքշաբթի էլ ադրբեջանական SOCAR ընկերության երկու աղբյուրներ Reuters-ին հայտնել են, որ Բաքու-Թբիլիսի-Ջեյհան խողովակաշարով տեղափոխվող ադրբեջանական նավթի աղտոտման խնդիրը լուծվել է, և թուրքական Ջեյհան նավահանգստից նավթի բեռնումները շարունակվում են։
Թարգմանությունը՝ Էմմա Չոբանյանի
