17.02.2026 | 01:59
Կարինա Ակոպովան ու Նիկիտա Ռախմանինը 14-րդ տեղը գրավեցին ձմեռային Օլիմպիական խաղերում
Մոսկվայից Բաքվին կոչ են անում ազատ արձակել «Sputnik Ադրբեջանի» կալանավորված լրագրողներին
Քաղաքականություն
30.07.2025 | 15:42
«Россия сегодня» մեդիախմբի գլխավոր տնօրեն Դմիտրի Կիսելյովը ՌԻԱ Նովոստիին տված մեկնաբանությունում կոչ է արել Բաքվին ազատ արձակել «անհիմն ձերբակալված «Sputnik Ադրբեջանի» լրագրողներին»։
«Նրանք, որոնք գիտակցաբար ձեռնարկել են այդ քայլը, հիանալի հասկանում էին, որ լրագրողների աշխատանքի նկատմամբ որևէ օբյեկտիվ պահանջի բացակայության դեպքում դա անխուսափելիորեն կհանգեցնի Ռուսաստանի և Ադրբեջանի միջև միջպետական հարաբերությունների բարդացմանը։ Հիմա, կարծես, մենք կարող ենք հանգիստ ազատել Իգոր Կարտավիխին և Եվգենի Բելոուսովին՝ այդպիսով նկատելի քայլ կատարելով մեր երկրների միջև հարաբերությունների վերականգնման ուղղությամբ։ Ես նաև համաձայն եմ, որ այդ վերականգնման ուղղությամբ շարժումն անհրաժեշտ է երկու կողմերից էլ»,- ասել է Կիսելյովը։
Նա հավելել է, որ «Sputnik Ադրբեջանի» լրագրողները Ռուսաստանի քաղաքացիներ են և ուղիղ մեկ ամիս է՝ անհիմն մեղադրանքներով բանտարկված են Ադրբեջանում։ Կիսելյովը նաև հիշեցրել է, թե ամբողջ մեդիա խմբի, այդ թվում՝ Sputnik ստորաբաժանման խմբագրական քաղաքականությունը միշտ ուղղված է եղել «մեր ներկայության երկրների հետ բարեկամական և դաշնակցային կապերի ամրապնդմանը»։
Հիշեցնենք, որ Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել էր ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։
Ռուսաստանի անվտանգության ուժերի գործողություններին ի պատասխան՝ Ադրբեջանի իշխանությունները Բաքվում ձերբակալել և ծեծի են ենթարկել 10-ից ավելի ռուսների, խուզարկություններ են անցկացրել «Sputnik Ադրբեջանի» խմբագրությունում և կալանավորել խմբագրության երկու անդամի։
Ավելի վաղ Բաքվի դատարանը մերժել էր «Sputnik Ադրբեջան»-ի լրագրողներ Իգոր Կարտավիխի և Եվգենի Բելոուսովի փաստաբանների՝ խափանման միջոցը փոխելու վերաբերյալ միջնորդությունները՝ ուժի մեջ թողնելով առաջին ատյանի դատարանի որոշումը։
Թարգմանությունը՝ Էմմա Չոբանյանի
