03.10.2026 | 22:08
Հայաստանի հավաքականը ժամանել է Պոդգորիցա
ՌԴ-ում քրեական հետապնդման լուրերի ֆոնին՝ Ալիևի նախկին խնամի, միլիարդատեր Աղալարովը Բաքու է ժամանել
Քաղաքականություն
29.07.2025 | 23:06
Ռուսաստանաբնակ ադրբեջանցի միլիարդատեր, Ադրբեջանի նախագահ Իլհամ Ալիևի նախկին խնամի Արազ Աղալարովը Բաքվում է։ Այս մասին Instagram-ում հայտնել է նրա որդին՝ երգիչ ու գործարար Էմին Աղալարովը, փոխանցում են ադրբեջանական լրատվամիջոցները։
Նշվում է, որ ՌԴ-ում հակաադրբեջանական արշավի մեկնարկից և ադրբեջանական սփյուռքի առաջնորդների ձերբակալություններից հետո մի շարք ռուսական լրատվամիջոցներ հայտնել էին, որ Արազ Աղալարովը նույնպես լքել է Ռուսաստանը՝ քրեական հետապնդման սպառնալիքի պատճառով։
Ենթադրվում է, որ նրա՝ Ադրբեջան ժամանումը կարող է կապված լինել Մոսկվայում տիրող անորոշ իրավիճակի հետ։
Ավելի վաղ հաղորդվել էր, որ ՌԴ-ում դատական կատարողական վարույթ են սկսել Արազ Աղալարովի նկատմամբ։
Հիշեցնենք, որ Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել էր ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ռուսաստանի անվտանգության ուժերի գործողություններին ի պատասխան՝ Ադրբեջանի իշխանությունները Բաքվում ձերբակալել և ծեծի են ենթարկել 10-ից ավելի ռուսների, խուզարկություններ են անցկացրել «Sputnik Ադրբեջանի» խմբագրությունում և կալանավորել խմբագրության երկու անդամի։
Հավելենք, որ Աղալարովն Ադրբեջանի նախագահ Իլհամ Ալիևի նախկին խնամին է։ Աղալարովի որդին՝ Էմին Աղալարովը, Ալիևի դուստր Լեյլա Ալիևայի նախկին ամուսինն է։ Նրանք ունեն երկու որդի և մեկ որդեգրված դուստր։
Թարգմանությունը՝ Էմմա Չոբանյանի
