ՌԴ-ում դատական կատարողական վարույթ են սկսել Իլհամ Ալիևի նախկին խնամու՝ ադրբեջանցի միլիարդատեր Արաս Աղալարովի նկատմամբ

ՌԴ անհատ պարտապանների ռեեստրի տվյալների համաձայն՝ Դաշնային դատական ​​կատարածուների ծառայությունը կատարողական վարույթ է սկսել ռուսաստանաբնակ ադրբեջանցի գործարար Արաս Աղալարովի նկատմամբ, գրում է Վեդոմոստին։

Վարույթը սկսվել է հունիսի 26-ին, իսկ Մոսկվայի Պրեսնենսկի շրջանային դատարանը համապատասխան կատարողական թուղթը փոխանցել է մայիսի 7-ին։

Ուշագրավ է, որ վարույթը հարուցվել է հունիսի 26-ին Եկատերինբուրգում ադրբեջանցիների ձերբակալությունից մեկ օր առաջ։

Աղալարովը Crocus Group-ի սեփականատերն է։ 2020 թվականին նա Forbes-ի «Ռուսաստանի 200 ամենահարուստ գործարարների» վարկանիշային աղյուսակում զբաղեցրել է 55-րդ տեղը՝ 1,7 միլիարդ դոլար կարողությամբ։ Նա ծնվել է 1955 թվականի նոյեմբերի 8-ին Բաքվում։ 1977 թվականին ավարտել է Բաքվի պոլիտեխնիկական ինստիտուտը՝ ստանալով բազմալիքային հեռահաղորդակցության մասնագիտությամբ։

Հավելենք, որ Աղալարովն Ադրբեջանի նախագահ Իլհամ Ալիևի նախկին խնամին է։ Աղալարովի որդին՝ Էմին Աղալարովը, Ալիևի դստեր՝ Լեյլա Ալիևայի նախկին ամուսինն է։ Նրանք ունեն երկու որդի և մեկ որդեգրված դուստր։

Ադրբեջանի և Ռուսաստանի հարաբերությունները վերջին օրերին սրվել են այն բանից հետո, երբ հունիսի 27-ին Եկատերինբուրգում ձերբակալվեցին ադրբեջանական ծագում ունեցող ավելի քան 50 անձինք։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Եվս երեք մարդ տեղափոխվել է վերակենդանացման բաժանմունք։ Բաքուն պահանջել է պատասխանատվության ենթարկել մեղավորներին, իսկ Ադրբեջանի արտաքին գործերի նախարարությունը «խիստ բողոք» է հայտնել Ռուսաստանի դեսպանին։

Ադրբեջանի գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից իր քաղաքացիների խոշտանգումների և սպանության փաստով։

Թարգմանությունը՝ Էմմա Չոբանյանի