Գազայում մարդասիրական օգնության սպասող 90-ից ավելի մարդ է զոհվել․ ՄԱԿ-ը մեղադրում է Իսրայելի բանակին

Գազայի հատվածում կիրակի սնունդ ձեռք բերելու փորձի ժամանակ առնվազն 92 մարդ է մահացել։ Այս մասին հայտնել են Գազայի առողջապահության ոլորտի պաշտոնյաները, գրում է Euronews-ը։

Մահվան դեպքերի մասին հաղորդվել է այն բանից հետո, երբ իսրայելական բանակը հրամայել է տարհանվել կենտրոնական Գազայից, որտեղ տեղակայված են բազմաթիվ միջազգային օգնության գործակալություններ: Իսրայելի բանակը հայտարարել է, որ հարվածներ է հասցրել զինյալների հետ կապված թիրախներին:

ՄԱԿ-ի Համաշխարհային պարենային ծրագիրը հայտարարություն է տարածել, որում ասվում է, որ հուլիսի 20-ի առավոտյան օգնություն տեղափոխող 25 բեռնատարներ անցել են Զիկիմի սահմանային անցակետը՝ նախատեսված Գազայի հյուսիսում գտնվող մարդկանց համար։ Կազմակերպությունը հայտնել է, որ վերջին անցակետն անցնելուց կարճ ժամանակ անց մարդիկ սկսել են մոտենալ շարասյանը, սակայն ենթարկվել են իսրայելական կողմից հարձակման։ Գազայի պաշտոնյաների տվյալներով՝ զոհվել է առնվազն 79 մարդ։

ՄԱԿ-ը հայտարարում է, որ Գազայի շուկաներում մեկ կիլոգրամ ալյուրի պարկի արժեքը գերազանցել է 100 դոլարը։

«Հանկարծ տանկերը շրջապատեցին մեզ և թակարդը գցեցին, կրակոցներ ու հարվածներ լսվեցին։ Մենք մոտ երկու ժամ թակարդում ենք մնացել։ Թողեք սովից մեռնենք, ավելի լավ է»,- ասել է Էհաբ ալ-Զեյը, որն ալյուրի է սպասել և նշել, որ 15 օր հաց չի կերել։

Վիրավորներից Նաֆիզ ալ-Նաջարը նշել է, որ տանկերն ու անօդաչու թռչող սարքերը հարձակվել են մարդկանց վրա, և ինքը տեսել է, թե ինչպես են իր զարմիկին և ուրիշներին սպանում։

Առնվազն 13 մարդ էլ զոհվել է Ռաֆահում և Խան Յունիսում գտնվող Գազայի մարդասիրական հիմնադրամի (GHF) կողմից կառավարվող վայրերի մոտ։

Իսրայելի զինվորականները հայտարարել են, թե զինվորները կրակ են բացել հյուսիսային Գազայի հատվածում գտնվող հազարավոր պաղեստինցիների վրա, որոնք, նրանց կարծիքով, սպառնալիք էին ներկայացնում, և որ իրենք տեղյակ են որոշ զոհերի մասին: Զինվորականները հայտարարել են, թե Գազայի իշխանություններն «ուռճացրել են զոհերի թիվը»։

Թարգմանությունը՝ Էմմա Չոբանյանի