06.10.2026 | 10:42
Հրանտ-Լեոն Ռանոսն առաջին գոլն է խփել Իսպանիայի Սեգունդայում. ՏԵՍԱՆՅՈՒԹ
Ֆրանսիան արագացված տեմպերով մեծացնում է պաշտպանական բյուջեն
Քաղաքականություն
14.07.2025 | 16:49
Ռուսաստանի կողմից եկող սպառնալիքի ֆոնին՝ Ֆրանսիան որոշել է արագացնել իր բանակի վերազինման տեմպը և այդ նպատակով պաշտպանության համար, նախատեսված ժամկետից շուտ, միլիարդավոր եվրո է հատկացնում։ Այս մասին հայտարարել է Ֆրանսիայի նախագահ Էմանուել Մակրոնը, գրում է DW-ի ռուսական ծառայությունը։
Նրա խոսքով՝ 2026 թվականին լրացուցիչ պաշտպանական ծախսերի ծավալը կկազմի 3,5 միլիարդ եվրո, իսկ 2027 թվականին՝ 3 միլիարդ եվրո։
«Այսպիսով, 2027 թվականին մեր պաշտպանության վրա կծախսենք 64 միլիարդ եվրո։ Սա կրկնակի ավելի է, քան 2017 թվականին զինված ուժերին, պաշտպանության համար հատկացված բյուջեն»,- հայտարարել է Մակրոնը հուլիսի 14-ին նշվող Ֆրանսիայի ազգային տոնի՝ Բաստիլի օրվա նախօրեին զինված ուժերին ուղղված ավանդական ուղերձում։
Ի սկզբանե, Ֆրանսիայի պաշտպանական բյուջեն նախատեսվում էր կրկնապատկել մինչև 2030 թվականը, հիշեցնում է dpa գործակալությունը։
«Երկրորդ համաշխարհային պատերազմի ավարտից՝ 1945 թվականից ի վեր, ազատությունը երբեք այսքան սպառնալիքի տակ չի եղել։ Մեր մայրցամաքում խաղաղությունը երբեք այսքան կախված չի եղել մեր ներկայիս որոշումներից»,- շեշտել է Էմանուել Մակրոնը՝ խոսելով Ուկրաինայի դեմ Ռուսաստաի պատերազմի մասին։
Ֆրանսիայի նախագահի կարծիքով՝ սպառնալիքներին դիմակայելու հնարավորություն ունենալու համար, Ֆրանսիան պետք է ավելի շատ ներդրում կատարի զինամթերքի, անօդաչու թռչող սարքերի, հակաօդային պաշտպանության, ինչպես նաև ռադիոէլեկտրոնային պայքարի միջոցների և տիեզերքում զենքի համակարգերի մեջ։ Մակրոնը կրկնել է միտքը, որ եվրոպական երկրները պետք է պաշտպանության հարցը վերցնեն իրենց ձեռքը և միասին ներդրումներ կատարեն սպառազինության մեջ։
Թարգմանությունը՝ Էմմա Չոբանյանի
