06.11.2026 | 23:24
Նոյեմբերի 7-ին ՊԵԿ էլեկտրոնային համակարգերը երկու ժամով անհասանելի կլինեն
ՌԴ-ում չորս ադրբեջանցի գործարար է կալանավորվել
Քաղաքականություն
14.07.2025 | 13:53
Ռուսաստանում շարունակվում են ադրբեջանցի գործարարների ձերբակալությունները. Լենինգրադի մարզում կալանավորվել է չորս ադրբեջանցի ձեռնարկատեր՝ տեղի ոստիկանության ղեկավարությանը կաշառելու մեղադրանքով։ Ադրբեջանական լրատվամիջոցները, ռուսական աղբյուրներին վկայակոչելով, հայտնում են, որ գործողությունը սկսվել է Լենինգրադի մարզի Վսևոլոժսկի շրջանի 128-րդ ոստիկանական բաժանմունքի պետ Սերգեյ Կորոտկովի ձերբակալությամբ: Անցյալ շաբաթ նրան ձերբակալել են ԱԴԾ հատուկ նշանակության ջոկատի աշխատակիցները։
Ռուսաստանի քննչական կոմիտեի տվյալներով՝ ոստիկանապետը մեղադրվում է ադրբեջանցի ձեռնարկատերերից առնվազն 3,7 միլիոն ռուբլի կաշառք ստանալու մեջ՝ «նրանց անօրինական գործարար գործունեության թողտվության դիմաց»։ Ձերբակալվել են նաև նույն շրջանի 87-րդ ոստիկանական վարչության պետ Ռոման Կամերզանովը և 97-րդ ոստիկանական վարչության պետ Ալեքսեյ Պերեմիբեդան։
Հետաքննությունը կարծում է, որ նրանք կաշառք են ստացել Լենինգրադի մարզում «անօրինական ձեռնարկատիրական գործունեությամբ» զբաղվող գործարարներից։
Տեղեկատվության համաձայն՝ ադրբեջանցի ձեռնարկատերերը մեղադրվում են «մաքսանենգ ալկոհոլի և ծխախոտի վաճառքի, ինչպես նաև անօրինական միգրանտներ հավաքագրելու» մեջ։ Ձերբակալված ադրբեջանցի գործարարներ Վյուսալ Օրուջովը, Իբադաթ Իսմայիլովը, Ասիֆ Ալլահվերդիևը և Արաստուն Թալիբովը մեղադրվում են ձերբակալված իրավապահ մարմինների աշխատակիցներին կաշառելու մեջ:
Ըստ ադրբեջանական աղբյուրների՝ այս ձերբակալությունները Ռուսաստանի և Ադրբեջանի միջև հարաբերություններում լարված իրավիճակի համատեքստում կարող են դիտարկվել որպես ադրբեջանական սփյուռքի վրա համակարգային ճնշման դրսևորում։
Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել է ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ադրբեջանի Գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից իր քաղաքացիների խոշտանգումների և սպանության փաստով։
Օրերս էլ, ի դեպ, Մոսկվայի մարզի ադրբեջանական սփյուռքի ղեկավար Էլշան Իբրահիմովն արտաքսվել էր Ռուսաստանից։
Բացի այդ, ՕՄՕՆ-ը Մոսկվայի շուկայում ադրբեջանցիների զանգվածային ձերբակալություններ էր իրականացրել։
Թարգմանությունը՝ Էմմա Չոբանյանի
