Հաշվի առնելով Սամվել Կարապետյանի հարաբերությունները Սերժ Սարգսյանի հետ` հնարավորություն կա. Աբրահամյանը` համախմբվելու մասին․ ՏԵՍԱՆՅՈՒԹ

Հաշվի առնելով Սամվել Կարապետյանի անձը և նրա հարաբերությունները «Հանրապետական» կուսակցության տարբեր դեմքերի և կուսակցության ղեկավար Սերժ Սարգսյանի հետ` բնական է, որ կա հնարավորություն նստելու, խոսելու քննարկելու։ Այս մասին Factor TV-ի հարցին ի պատասխան ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով Սամվել Կարապետյանի շուրջ համախմբվելու խոսակցություններին։

«Բայց կարծում եմ՝ դեռևս կարիք չկա իրադարձություններից առաջ ընկնել։ Եթե մենք խոսում ենք ինչ-որ պրոցեսի շուրջ համախմբվելու մասին, նախ դրա հիմքում առաջարկի գաղափարն է, այսինքն՝ ոչ թե անձանց, այլ գաղափարի շուրջ են համախմբվում։ Երկրորդը, նախ այդ ուժը պետք է ձևավորվի, հասկանանք՝ որ ուղղությամբ է շարժվում, հիմքում գաղափարական և ծրագրային առումով ինչ մոտեցումներ են և հասկանանք, թե ստեղծված իրավիճակում ինչպիսի ելքեր կան կամ չկան»,- նշեց ընդդիմադիր պատգամավորը։

Հիշեցնենք, որ օրեր առաջ Սամվել Կարապետյանը կալանավայրից հայտարարություն էր տարածել՝ նշելով, որ Նիկոլ Փաշինյանն ու իր կառավարությունն անելիք չունեն Հայաստանում և «գալիս է սկզբունքորեն նոր ուժի շուրջ միավորվելու ժամանակը»։

Միլիարդատեր գործարարի խոսքով՝ պայքարը նպատակ ունի վերջ տալ մի շարք բացասական երևույթների, որոնց թվում նա նշել է «արժանապատվության վերականգնումը, արհեստական պառակտումը սփյուռքի հետ, բռնաճնշումներն ու ապօրինությունները, պարտությունն ու նվաստացումը, աղքատությունն ու հուսահատությունը»։

Թե ինչի մասին է խոսքը, ով է առաջնորդելու այդ պայքարը՝ Factor TV-ն երեկ այս հարցերն ուղղեց Սամվել Կարապետյանի եղբորորդուն՝ Նարեկ Կարապետյանին, որը սակայն ըստ էության չպատախանեց։

«Այդ մասին հանդես կգանք հայտարարություններով, բոլոր հարցերը, որ մտահոգում են մեր հանրությանը, կստանան պատասխաններ»,- ասաց Կարապետյանը և հեռացավ։

Հարցազրույցն ամբողջությամբ՝ տեսանյութում։

Արփի Հակոբյան