07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Աջարիայի նախկին ղեկավարը հրազենային վիրավորումով հոսպիտալացվել է
Քաղաքականություն
07.07.2025 | 17:58
Աջարիայի Ինքնավար Հանրապետության կառավարության նախկին ղեկավար Թորնիկե Ռիժվաձեն հրազենային վնասվածք է ստացել։ Վրաստանի Ներքին գործերի նախարարության հաղորդմամբ՝ նա կրծքավանդակի վիրավորմամբ տեղափոխվել է Սագարեջոյի «Geo Hospitals» կլինիկա, փոխանցում է Эхо Кавказа-ն։
Բժիշկների խոսքով՝ Ռիժվաձեի թոքը վնասված է, նրա վիճակը գնահատվում է կայուն ծանր։
Հետաքննություն է սկսվել ինքնասպանության դրդելու հոդվածով, որը կիրառվում է, երբ միջադեպի հանգամանքները պարզ չեն։ Ներքին գործերի նախարարության տվյալներով՝ հրազենի անզգույշ պահպանման մեղադրանքով ձերբակալվել է Ծովային տրանսպորտի գործակալության ղեկավար Ալեքսի Ախվլեդիանին։
Կառավարամետ լրատվամիջոցները պնդում են, որ բժիշկները գտել են Թորնիկե Ռիժվաձեի նամակը, որում նա պատմում է ինքնասպանության պատճառների մասին, և այն փոխանցել են լրագրողներին։ Սակայն աղբյուրները «Բաթումելեբի»-ին հայտնել են, որ բժշկական անձնակազմը որևէ նամակ չի փոխանցել լրագրողներին:
Ռիժվաձեն Աջարիայի կառավարության ղեկավարի պաշտոնը զբաղեցրել է 2018 թվականի հուլիսից։ Նա հրաժարական է տվել 2025 թվականի ապրիլի 4-ին, որի մասին հայտարարել է ֆեյսբուքյան գրառմամբ։ Ներկայում Աջարիայի կառավարության ղեկավարի պաշտոնը զբաղեցնում է Սուլխան Թամազաշվիլին, որը գտնվում է պատժամիջոցների տակ։
Թարգմանությունը՝ Էմմա Չոբանյանի
