Չեխիայում էլեկտրաէներգիայի մասշտաբային անջատումներ են. Պրահայի մետրոն կանգ է առել

Չեխիայում էլեկտրաէներգիայի մասշտաբային անջատում է տեղի ունեցել։ Չեխական ռադիոյի տվյալներով՝ Պրահայի մեծ մասում, ինչպես նաև Մլադա Բոլեսլավում, Ուստի նադ Լաբեմում, Տեպլիցեում, Կոլինում, Պարդուբիցեում, Հրադեց Կրալովեում և Չեսկա Լիպայում էլեկտրաէներգիա չկա, փոխանցում է Current time-ը։

«Չեխիայի որոշ շրջաններում էլեկտրաէներգիայի անջատում է տեղի ունեցել։ Մենք հետաքննում ենք պատճառները և լուծում խնդիրը։ Կենտրոնական ճգնաժամային շտաբը սպասման ռեժիմում է»,- X սոցիալական ցանցում հայտարարել է Չեխիայի վարչապետ Պետր Ֆիալան։

Pražská energetika ընկերությունը հայտնել է, որ հոսանքի անջատումը տեղի է ունեցել Պրահայի Խոդով շրջանի ենթակայանում տեղի ունեցած վթարի պատճառով: Մասնագետները աշխատում են խնդիրը լուծելու ուղղությամբ, սակայն դեռևս պարզ չէ, թե որքան ժամանակ կպահանջվի դրա համար:

Չեխական երկաթուղիները հայտնել են, որ Պրահայի և Կոլինի, ինչպես նաև Կոլինի և Կուտնա Հորայի միջև գնացքների երթևեկությունը դադարեցվել է: Պրահայում մետրոն և տրամվայները չեն աշխատում, և փրկարարները ստիպված են եղել մարդկանց դուրս բերել կանգնած վերելակներից:

Հիշեցնենք, որ ապրիլի վերջին Իսպանիայում, Պորտուգալիայում, Ֆրանսիայում և Անդորրայում տեղի էին ունեցել էլեկտրաէներգիայի խոշոր անջատումներ: Պորտուգալական REN (Rede Elétrica Nacional) էներգետիկ ընկերությունը հայտարարել էր, որ Իսպանիայում, Պորտուգալիայում և Ֆրանսիայի որոշ հատվածներում խոշոր անջատումների պատճառը ջերմաստիճանի ծայրահեղ փոփոխություններն են։

Թարգմանությունը՝ Էմմա Չոբանյանի