Սո՛ւտ է, չեմ իմացել, որ կառուցապատման հետ կապ ունի Սեյրան Օհանյանը․ Արծվիկ Մինասյան․ ՏԵՍԱՆՅՈՒԹ

«Սո՛ւտ, ես ոչ միայն չեմ իմացել, թե ով է կառուցապատել, ավելին՝ Սեյրան Օհանյանը կապ ունի կառուցապատման հետ, թե՝ ոչ։ Ես ընդամենը ասել եմ, որ ինձ փոխանցված տեղեկությունների համաձայն առանձնատունը օգտագործվում է պարոն Օհանյանի կողմից։ Ինչո՞ւ եք բաներ վերագրում ինձ, որ իրականության հետ կապ չունեն, ավելի տպավորիչ դարձնելու համա՞ր»,- ԱԺ արտահերթ նիստում հայտարարեց «Հայաստան» խմբակցության քարտուղար Արծվիկ Մինասյանը՝ անդրադառնալով իրեն վերագրվող ենթարդրյալ մեղադրանքին։

Նա հայտարարեց, թե գլխավոր դատախազին կա՛մ ճիշտ չեն զեկուցել, կա՛մ պատշաճ ուսումնասիրություն չի իրականացրել այս գործի մանրամասների մասին։ Արծվիկ Մինասյանի պնդմամբ՝ որևէ իրավական նորմ դատախազը չի կարող վկայակոչել, որ խախտվել է:

«Այն բոլոր պնդումները, թե, իբր, եղել են ձևական, իրականությանը չի համապատասխանում: Մրցույթն իրականացվել է ըստ գործող կարգավորումների: Որևէ արգելք որևէ անձի նկատմամբ չի եղել: Բնապահպանության նախարարը և նախարարության աշխատակիցները չունեն որևէ իրավական պարտավորություն՝ ստուգելու, պարզելու անձանց փոխկապակցվածության վերաբերյալ»,- նշեց նա։

Ըստ Արծվիկ Մինասյանի՝ իր համար վիրավորականը ոչ թե ենթադրյալ մեղադրանքն է, այլ այն, որ ԱԺ ամբիոնն օգտագործում են «իր անունը վարկաբեկելու համար»։

Նշենք, որ խորհրդարանն արտահերթ նիստում քննարկում է Արծվիկ Մինասյանին անձեռնմխելիությունից զրկելու և նրա նկատմամբ հանրային քրեական հետապնդում հարուցելուն համաձայնություն տալու մասին միջնորդագիրը։ Գլխավոր դատախազ Աննա Վարդապետյանը միջնորդագրի ներկայացման ժամանակ ասել էր, որ «Արծվիկ Մինասյանը տեղյակ է եղել, որ Սեյրան Օհանյանը ապօրինի զավթել է Սևան ազգային պուրակին պատկանող հատուկ պահպանվող տարածքում գտնվող հողատարածքը»։

Մանրամասները՝ տեսանյութում։

Մանյա Պողոսյան