Կրեմլը մեկնաբանել է Թրամփի խոսքերը, որ «շատ հիասթափված» է Պուտինի հետ զրույցից

Կրեմլը ուշադիր հետևում է ԱՄՆ նախագահ Դոնալդ Թրամփի բոլոր հայտարարություններին։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը՝ պատասխանելով հարցին, թե որքանով է Կրեմլը մտահոգված Սպիտակ տան ղեկավարի խոսքերից՝ հինգշաբթի ՌԴ նախագահ Վլադիմիր Պուտինի հետ հեռախոսազրույցից իր հիասթափության և այն մասին, որ Ռուսաստանի առաջնորդը չի ցանկանում վերջ դնել ուկրաինական հակամարտությանը, գրում է Ինտերֆաքսը։

«Զրույցի ընթացքում նախագահ Պուտինը կրկնել է, որ մենք հետաքրքրված ենք նրանով, որ հասնենք մեր նպատակներին հատուկ ռազմական գործողության ընթացքում (ՌԴ-ն այսպես է որակում Ուկրաինա ներխուժումը), և նախընտրելի է դա անել քաղաքական և դիվանագիտական ​​միջոցներով։ Բայց քանի որ դա դեռևս հնարավոր չէ, մենք շարունակում ենք մեր հատուկ ռազմական գործողությունը»,- ասել է Կրեմլի խոսնակը։

Պեսկովը հավելել է՝ «նախագահը նաև տեղեկացրել է իր ամերիկացի գործընկերոջը, որ այժմ սպասում ենք ուղիղ բանակցությունների երրորդ փուլի ամսաթվերի համաձայնեցմանը»:

Թրամփը լրագրողների հետ զրույցում հայտարարել էր․ «Ես շատ հիասթափված եմ այսօր նախագահ Պուտինի հետ ունեցած զրույցից, քանի որ, իմ կարծիքով, նա պատրաստ չէ։ Դա շատ հիասթափեցնող է։ Ես պարզապես ասում եմ, որ չեմ կարծում՝ նա պատրաստվում է կանգ կառնել և դա տխուր է»։

Նա նաև հայտարարել էր, որ Պուտինի հետ հեռախոսազրույցի ընթացքում առաջընթացի չի հասել Ուկրաինայում ռուսական պատերազմի ավարտի հարցում։

Թարգմանությունը՝ Էմմա Չոբանյանի