Զախարովան հայտնել է, որ Բաքուն ՌԴ հյուպատոսության աշխատակիցներին թույլատրել է այցելել ձերբակալված ռուսներին

Ադրբեջանի իշխանությունները ՌԴ հյուպատոսության աշխատակիցներին թույլատրել են հանդիպել ձերբակալված ռուսներին։ Այս մասին ՌԻԱ Նովոստիին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։

«Հյուպատոսական աշխատակիցների համար Ադրբեջանում ձերբակալված Ռուսաստանի 13 քաղաքացու մոտ մուտք գործելու վերաբերյալ համաձայնություն է ձեռք բերվել»,- ասել է նա՝ առանց որևէ մանրամասն հայտնելու։

Հիշեցնենք, որ ավելի վաղ Բաքվի դատարանը Իրանից թմրանյութերի տարանցման համար ձերբակալված ՌԴ 8 քաղաքացու 4 ամսով կալանավորելու որոշում էր կայացրել։

Բացի այդ, Բաքվի դատարանը 4 ամսով կալանավորել է նաև Sputnik Ադրբեջանի աշխատակիցներին։ Ռուսական կողմն ավելի վաղ հայտնել էր, որ Բաքվում ՌԴ դեսպանատան աշխատակիցներին չի թույլատրվել այցելել ձերբակալված ռուսներին։

Ադրբեջանի և Ռուսաստանի հարաբերությունները վերջին օրերին սրվել են՝ այն բանից հետո, երբ հունիսի 27-ին Եկատերինբուրգում ձերբակալվել էին ադրբեջանական ծագում ունեցող ավելի քան 50 անձինք։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։

Եվս երեք մարդ տեղափոխվել է վերակենդանացման բաժանմունք։ Բաքուն պահանջում է պատասխանատվության ենթարկել մեղավորներին, իսկ Ադրբեջանի արտաքին գործերի նախարարությունը «խիստ բողոք» է հայտնել Ռուսաստանի դեսպանին։ Ադրբեջանի գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից ադրբեջանցիների խոշտանգումների և սպանության փաստով։

ՌԴ Քննչական կոմիտեն սպանության մեղադրանք է առաջադրել Եկատերինբուրգում ձերբակալված ադրբեջանցիներին։ Դատարանը մինչև հուլիսի 19-ը կալանավորել է ութ անձի՝ Այազ, Ակիֆ, Մազահիր, Բաքիր և Քամալ Սաֆարովներին, ինչպես նաև Ախլիման Գյանջիևին, Շահին Լալաևին և Ազիզ Աբասովին։

Թարգմանությունը՝ Էմմա Չոբանյանի