Թռնեք օդ, իջնեք ցած, սա ՀԷՑ-ը խլելու նախագիծ է․ Աննա Գրիգորյանը՝ փոխնախարարին․ ՏԵՍԱՆՅՈՒԹ

«ՀԷՑ-ի խլման գործընթացը առաջարկում եք քննել 24–ժամյա ռեժիմով, ինչո՞ւմն է հրատապությունը: Եղել է Սամվել Կարապետյանի հայտարարությունը եկեղեցու պաշտպանության մասով, և դա հրատապություն է առաջացրել։ Եթե այս մոտեցման հետ համաձայն չեք, ասեք` ինչո՞ւմ է հրատապությունը»,- ԱԺ արտահերթ նիստին ՏԿԵ փոխնախարար Արմեն Սիմոնյանին հարցրեց «Հայաստան» խմբակցության պատգամավոր Աննա Գրիգորյանը։

Պաշտոնյան պարզաբանեց, որ նախագծում «ՀԷՑ» և «խլել» բառերը չկան, և օրենսդրական փոփոխությունները վերաբերում են էներգետիկ ոլորտի բարեփոխումներին։

Ի պատասխան ընդդիմադիր պատգամավոր Աննա Գրիգորյանն արձագանքեց` «Եթե հրատապությունն այն է, որ դուք տեսնում եք խնդիրներ ՀԷՑ-ում, հենց երեկ ու այսօ՞ր դա տեսաք, մի ամիս, մի տարի առաջ չէիք տեսնո՞ւմ։ Թռնեք օդ, իջնեք ցած, սա ՀԷՑ-ը խլելու նախագիծ է»։

Նշենք, որ խորհրդարանն արտահերթ նիստում քննարկում է «Հայաստանի էլեկտրական ցանցեր» ՓԲԸ-ի պետականացումն իրագործելու նպատակով շրջանառության մեջ դրված օրենսդրական փոփոխությունների նախագիծը։ «Քաղաքացիական պայմանագիր» խմբակցությունն առաջարկում է փոփոխություններ և լրացումներ կատարել «Էներգետիկայի մասին» և «Հանրային ծառայությունները կարգավորող մարմնի մասին» օրենքներում։

Նախագծի հիմնավորման մեջ նշվում է, որ առաջարկվող փոփոխություններով նախատեսվում է սահմանել ոլորտի լիցենզավորված անձանց գործունեության առանձնահատուկ ռիսկայնության դեպքում Կառավարության լիազոր մարմնի կողմից հաղորդում տալը և դրա հետևանքները, սահմանել ոլորտի լիցենզավորված անձանց նկատմամբ վարույթ հարուցելիս նրանց նկատմամբ կանխարգելիչ միջոցառումներ իրականացնելու հնարավորությունը։ Նախագծի հիմնավորման մեջ նաև նշվում է, որ նպատակն է ապահովել էներգետիկայի բնագավառում սպառողների իրավունքների և օրինական շահերի առավել համապարփակ պաշտպանությունը՝ հաշվի առնելով նաև ոլորտի գործունեություն կրիտիկական կարևորությունը:

Մանրամասները՝ տեսանյութում։

Մանյա Պողոսյան