Իրանի ԱԳ նախարարը նշել է ԱՄՆ-ի հետ բանակցությունների վերսկսման պայմանը

Իրանի արտաքին գործերի նախարար Աբբաս Արաղչին ԱՄՆ-ի կողմից ռազմական սպառնալիքների դադարեցումը համարել է Թեհրանի և Վաշինգտոնի միջև միջուկային բանակցությունների վերսկսման նախապայման։ CBS հեռուստաալիքին տված հարցազրույցում նա հայտարարել է, որ Իրանի և ԱՄՆ-ի միջև միջուկային բանակցությունները չեն վերսկսվի, քանի դեռ ԱՄՆ-ը չի դադարեցրել ռազմական սպառնալիքները, փոխանցում է Mehr գործակալությունը։

«Բանակցությունները վերսկսելու վերաբերյալ որոշում կայացնելու համար մենք նախ պետք է համոզվենք, որ Վաշինգտոնը կրկին չի շահագործի բանակցությունները ռազմական ագրեսիայի համար»,- ասել է նա՝ հավելելով. «Դիվանագիտության դռները երբեք չեն փակվի»։

Արաղչին նաև ընդգծել է, որ ուրանի հարստացումը զարգացած, գիտության վրա հիմնված արդյունաբերություն է:

«Եթե այս արդյունաբերությունը վնասվի կամ ոչնչացվի, մենք կարող ենք արագ վերականգնել վնասը և հաղթահարել խոչընդոտները՝ այս ոլորտում կրկին առաջընթաց գրանցելու համար: Հարստացման տեխնոլոգիան և գիտելիքները չեն կարող ոչնչացվել ռմբակոծությամբ։ Մեր երկրի խաղաղ միջուկային ծրագիրը դարձել է ազգային հպարտության և արժանապատվության աղբյուր»,- հայտարարել է նա։

Պաշտոնյան հավելել է՝ Իրանը 12 օր անցել է պարտադրված պատերազմի միջով, հետևաբար, «իրանական ազգը հեշտությամբ չի նահանջի ուրանի հարստացումից»։

«Պատերազմի ընթացքում մենք ցույց տվեցինք մեր ուժն ու կամքը՝ պաշտպանվելու համար, և մենք կշարունակենք դա անել ցանկացած ագրեսիայի դեպքում»,- հայտարարել է նա։

Ավելի վաղ էլ Արաղչին հերքել էր ԱՄՆ նախագահ Դոնալդ Թրամփի պնդումը՝ նշելով, որ չկա բանակցությունների վերսկսման որևէ ծրագիր։

Թարգմանությունը՝ Էմմա Չոբանյանի