16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Հարևան երկրները մեզ վստահեցրել են, որ սիոնիստական ռեժիմին թույլ չեն տա իրենց տարածքը չարաշահել Իրանի դեմ․ Բաղայի
Քաղաքականություն
30.06.2025 | 16:03
Հարևան երկրների տարածքի ցանկացած չարաշահում Իրանի դեմ արգելված է և մերժվել է այդ երկրների կողմից։ Այս մասին հայտարարել է Իրանի ԱԳՆ խոսնակ Էսմայիլ Բաղային, գրում է IRNA-ն։
«Բազմաթիվ նորություններ են հրապարակվել։ Մենք այս տեղեկատվությունը և երբեմն ենթադրությունները կիսվել ենք համապատասխան երկրների հետ։ Հարևան երկրները, անշուշտ, գիտակցում են իրենց պարտավորությունները՝ թե՛ բարիդրացիական քաղաքականության շրջանակում, թե՛ միջազգային իրավունքի համաձայն»,- ասել է Բաղային՝ խոսելով Իրանի դեմ ռազմական ագրեսիայի գործողություններ իրականացնելու համար Իսրայելի կողմից այլ երկրների տարածքի չարաշահման մասին։
Նա հավելել է, որ միջազգային իրավունքի համաձայն՝ ոչ մի երկրի թույլատրված չէ, նույնիսկ արգելված է իր տարածքը տրամադրել այլ երկրներին ագրեսիայի գործողություններ իրականացնելու համար։
«Առանց բացառության՝ բոլոր հարևան երկրները մեզ վստահեցրել են, որ թույլ չեն տա սիոնիստական ռեժիմին չարաշահել իրենց տարածքը կամ օդային տարածքը Իրանի դեմ ագրեսիայի գործողություններ իրականացնելու համար: Մենք զեկույցներով կիսվել ենք այդ երկրների հետ և լսել նրանց բացատրությունները։ Ես հայտարարում եմ, որ մեր բարձրացրած բոլոր դեպքերը հստակորեն և վճռականորեն մերժվել են համապատասխան երկրների կողմից, նրանք մեզ վստահեցրել են, որ ոչ միայն նման թույլտվություն չի տրվել, այլև ապագայում չի տրվի: Այս հարցը դեռևս քննարկվում է, նման դեպքերը փաստաթղթավորվում են մեր զինված ուժերի, անվտանգության և ռազմական մարմինների կողմից»,- հայտարարել է Իրանի ԱԳՆ խոսնակը։
Հիշեցնենք, որ Ադրբեջանի նախագահ Իլհամ Ալիևի հետ հեռախոսազրույցում Իրանի նախագահ Մասուդ Փեզեշքիանը կոչ էր արել հետաքննել իսրայելական ԱԹՍ-ների՝ Ադրբեջանի օդային տարածքով Իրան մտնելու մասին հաղորդումները։
Իրանի նորանշանակ դեսպանի հետ հանդիպմանն էլ Ալիևն ասել էր, որ «Իրանի և Իսրայելի միջև այս լարվածության հետ կապված որոշ շրջանակներ և լրատվամիջոցների ներկայացուցիչներ տարածում են ասեկոսեների և ստերի վրա հիմնված տեղեկատվություն՝ ադրբեջանա-իրանական հարաբերություններին վնասելու նպատակով, և որ այդ ամենը լիակատար անհեթեթություն է»։
Բացի այդ, Ադրբեջանի ԱԳՆ-ն, արձագանքելով ՀՀ-ում Իրանի դեսպանի հայտարարություններին, հերքել էր, որ երկրի տարածքն օգտագործվել է Իրանի դեմ ռազմական գործողությունների համար։
Թարգմանությունը՝ Էմմա Չոբանյանի
