Անչափահաս երեխաների` Ադրբեջանում հայտնվելու դեպքով առևանգման հոդվածով քրեական վարույթ է նախաձեռնվել

Անչափահաս երեխաների՝ ադրբեջանական կողմում հայտնվելու դեպքով առևանգման հոդվածով քրեական վարույթ է նախաձեռնվել:

Այս մասին Factor TV-ի հարցին ի պատասխան հայտնեցին Քննչական կոմիտեից:

Հիշեցնենք, որ այսօր առավոտյան Ազգային անվտանգության ծառայությունը հաղորդագրություն է տարածել նշելով՝ Սյունիքի մարզի երկու անչափահաս բնակիչ մոլորվել և հայտնվել է Ադրբեջանի տարածքում. «Ստացված տվյալների համաձայն՝ ՀՀ Սյունիքի մարզի Տեղ համայնքի բնակիչներ Կարեն Արմենի Ջհանգիրյանը (ծնված 27.06.2007թ.) և Անդրեյ Արմենի Գյագունցը (ծնված 13.01.2008թ.) 2025 թվականի հունիսի 6-ին՝ ժամը 01:20-ի սահմաններում, Սյունիքի մարզի Արավուս գյուղի հարակից հատվածում՝ տեղանքում մոլորվելու հետևանքով հայտնվել են Ադրբեջանի տարածքում»,- նշվում է հաղորդագրությունում։

Factor TV-ի հետ զրույցում Սյունիքի մարզի Արավուսի նախկին համայնքապետ, Տեղ համայնքի ավագանու անդամ Արգամ Հովսեփյանն էլ հայտնել էր, որ գիշերը ժամը 1-ի սահմաններում երկու տղաները ձի են նստել ու գնացել սահմանի մոտ գտնվող իրենց ձիուն բերելու։ «Գնացել ու բռնվել են էլի»,- ասել էր Հովսեփյանը:

Վերջինս հայտնել էր, որ տղաներից մեկն իրենց՝ Արավուս գյուղից է, մյուսը՝ Տեղից։ Ավագանու անդամը պատմում է՝ անգամ ծնողները չեն իմացել, որ տղաները գնացել են ձիու հետևից, առավոտյան են տեսել, որ տանը չեն:

«Առավոտյան մենք տեսել ենք, թե ոնց են տղաներին ավտոն նստեցրել ու տարել»,- հայտնել էր նա, իսկ Factor TV-ի ճշտող հարցին՝ ստացվում է, ադրբեջանական ուժերը ողջ գիշերը տղաներին պահել են և միայն առավոտյա՞ն տարել, Հովսեփյանը դրական պատասխան էր տվել՝ առանց մանրամասներ ներկայացնելու. «Ճիշտ չի փակագծեր բացեմ՝ ոնց տեսա, ինչով տեսա, ես Ձեզ ասում եմ՝ 100 տոկոս տարել են։ Հույս ունեմ՝ շուտ կվերադառնան»,-ասել էր Հովսեփյանը։

Արաքս Մամուլյան