«Տղաներին ավտոն նստեցրել են ու տարել». Արավուսի նախկին համայնքապետը մանրամասներ է պատմում Սյունիքում երկու անչափահասների՝ ադրբեջանական կողմում հայտնվելու դեպքից․ ՏԵՍԱՆՅՈՒԹ

«Գիշերը ժամը 1-ի սահմաններում էդ երկու տղաները ձի են նստել ու գնացել սահմանի բերանը գտնվող իրենց ձիուն բերեն։ Գնացել ու բռնվել են էլի»,- Factor TV-ի հետ զրույցում ասաց Սյունիքի մարզի Արավուսի նախկին համայնքապետ, Տեղ համայնքի ավագանու անդամ Արգամ Հովսեփյանը՝ անդրադառնալով այսօր գիշեր մոլորված երկու անչափահասների դեպքին։

Հիշեցնենք՝ այսօր առավոտյան Ազգային անվտանգության ծառայությունը հաղորդագրություն տարածեց, նշելով՝ Սյունիքի մարզի երկու անչափահաս բնակիչ մոլորվել և հայտնվել է Ադրբեջանի տարածքում.

«Ստացված տվյալների համաձայն՝ ՀՀ Սյունիքի մարզի Տեղ համայնքի բնակիչներ Կարեն Արմենի Ջհանգիրյանը (ծնված 27.06.2007թ.) և Անդրեյ Արմենի Գյագունցը (ծնված 13.01.2008թ.) 2025 թվականի հունիսի 6-ին՝ ժամը 01:20-ի սահմաններում, Սյունիքի մարզի Արավուս գյուղի հարակից հատվածում՝ տեղանքում մոլորվելու հետևանքով հայտնվել են Ադրբեջանի տարածքում»,- նշվում է հաղորդագրությունում։

Հովսեփյանի խոսքով՝ տղաներից մեկն իրենց՝ Արավուս գյուղից է, մյուսը՝ Տեղից։ Ավագանու անդամը պատմում է՝ անգամ ծնողները չեն իմացել, որ տղաները գնացել են ձիու հետևից, առավոտյան են տեսել, որ տանը չեն. «Առավոտյան մենք տեսել ենք, թե ոնց են տղաներին ավտոն նստեցրել ու տարել»։

Մեր ճշտող հարցին՝ ստացվում է, ադրբեջանական ուժերը ողջ գիշերը տղաներին պահել են և միայն առավոտյա՞ն տարել, Հովսեփյանը դրական պատասխան տվեց՝ առանց մանրամասներ ներկայացնելու.

«Ճիշտ չի փակագծեր բացեմ՝ ոնց տեսա, ինչով տեսա, ես Ձեզ ասում եմ՝ 100 տոկոս տարել են։ Հույս ունեմ՝ շուտ կվերադառնան, երիտասարդ տղերք են, 12-րդ դասարանն ավարտել էին, մի ամսից պետք ա բանակ գնային։ Ծնողները շատ վատ վիճակում են, ահավոր ա, սուգ ա»։

Factor TV-ի հարցին՝ հնարավո՞ր է, որ ադրբեջանցիներն են առաջ եկել և գերեվարել տղաներին, Հովսեփյանը նշեց՝ կեսգիշեր է եղել, մութ, հնարավոր է առաջ են եկել, հնարավոր է՝ տղաներն են անցել սահմանը։

Մանրամասները՝ տեսանյութում։

Ռոզա Վարդանյան