Սամվել Շահրամանյանի հարցաքննությունն ավարտվել է․ ինչ վարույթով էր նա հրավիրվել Քննչական կոմիտե․ ՏԵՍԱՆՅՈՒԹ

Սամվել Շահրամանյանը հարցաքննվել է երեք տարբեր վարույթի շրջանակում, ունի վկայի դատաիրավական կարգավիճակ։ Այս մասին լրագրողների հետ զրույցում ասաց Արցախի նախագահի փաստաբան Ռոման Երիցյանը՝ նրա հերթական հարցաքննությունից հետո։

«Արցախի նախագահը երբևէ որևէ հարցաքննությունից չի խուսափել։ Այս վարույթը, որի շրջանակում այսօր հարցաքննվում էր նախագահը, վերաբերում է պատերազմի ժամանակ ցուցաբերած զինվորական պաշտոնեական անփութությանը, ինչպես նաև զենք-զինամթերքը և սպառազինությունը թշնամուն հանձնելուն։ Թե ինչ բովանդակության հարցեր ու պատասխաններ են հնչում, չեմ կարող ասել»,- ասաց Ռոման Երիցյանը։

Փաստաբանի խոսքով՝ վարույթը նախաձեռնվել է 2023 թվականի հոկտեմբերին՝ այսինքն արցախցիների բռնի տեղահանումից հետո։ Շահրամանյանն այդ վարույթի շրջանակում սկսել է հարցաքննվել այս տարվա մայիսից և արդեն 4-5 անգամ հարցաքննության է հրավիրվել, հաջորդ հարցաքննությունը նշանակված է հունիսի 6-ին։

«Ես կարող եմ հայտարարել վարույթն իրականացնող մարմնի բարձրաձայնած այն դիրքորոշումը, որ սա կրում է նաև պատմական բնույթ։ Հայաստանը փորձում է պարզել իրողությունը, և սա նաև ինֆորմացիա ձեռք բերելու հնարավորություն է՝ ինչ է տեղի ունեցել կամ տեղի չի ունեցել»,- նշեց Երիցյանը։

Հիշեցնենք՝ օրեր առաջ Armlur.am-ը գրել էր, որ Շահրամանյանը 5-6 անգամ հարցաքննության է հրավիրվել ՀՀ Քննչական կոմիտեի զինվորական քննչական գլխավոր վարչություն և չի բացառվում, որ կալանավորեն նրան։ Ռոման Երիցյանն այսօր չբացառեց, որ հետագայում կարող են Սամվել Շահրամանյանի նկատմամբ իր ձևակերպմամբ «մտացածին քրեական հետապնդումներ» սկսել։

Մանրամասները՝ տեսանյութում։

Արփի Հակոբյան