13.01.2026 | 10:05
Լարս ավտոճանապարհը փակ է բոլոր տեսակի տրանսպորտային միջոցների համար
PKK-ն կոչ է արել մեղմացնել Աբդուլլահ Օջալանի բանտարկության պայմանները
Քաղաքականություն
20.05.2025 | 22:13
Քուրդիստանի աշխատավորական կուսակցությունը (PKK) հայտարարել է, որ Թուրքիան պետք է մեղմացնի իր հիմնադիր Աբդուլլահ Օջալանի բանտարկության պայմանները՝ նրան հայտարարելով լուծարման որոշումից հետո ապագա ցանկացած բանակցություններում խմբի «գլխավոր բանակցող», գրում է Turkish Minute-ը:
Թուրքիայի և նրա արևմտյան դաշնակիցների կողմից ահաբեկչական կազմակերպություն ճանաչված քրդական խմբավորումը մայիսի 12-ին հայտարարեց, որ որոշել է զինաթափվել և լուծարվել թուրքական պետության դեմ տարիներ շարունակ տեղի ունեցած ապստամբությունից հետո, որը խլել է ավելի քան 40,000 մարդու կյանք։
Խմբի պատմական որոշումը կայացվել է Օջալանի կողմից Ստամբուլի Իմրալը կղզու բանտից ուղարկված նամակից հետո, որտեղ նա պահվում է 1999 թվականից։
PKK-ի քաղաքական թևի խոսնակ Զագրոս Հիվան AFP-ին հայտնել է՝ ակնկալում են, որ «թուրքական պետությունը փոփոխություններ կկատարի նրա մենախցում»՝ Օջալանին «ազատ և անվտանգ աշխատանքային պայմաններ տրամադրելու համար, որպեսզի նա կարողանա ղեկավարել գործընթացը»։
1999 թվականին բանտարկվելուց ի վեր Օջալանն իր ժամանակի մեծ մասն անցկացրել է գրեթե լիակատար մեկուսացման մեջ՝ հաճախ՝ երկար ժամանակով առանց փաստաբանների կամ ընտանիքի անդամների հետ հանդիպելու հնարավորության։ Թուրքական իշխանություններն այցելությունները սահմանափակելու համար անվտանգության նկատառումներ են ներկայացրել։ 2009 թվականին ահաբեկչության մեջ դատապարտված մի քանի այլ կալանավորներ տեղափոխվել են Իմրալը։ Օջալանին թույլատրվել է սահմանափակ շփում այդ կալանավորների հետ սահմանված ժամերին։
Հիվան հարցազրույցում հավելել է, որ «առաջնորդ Ափոն իրենց գլխավոր բանակցողն է» Թուրքիայի հետ ցանկացած բանակցությունների համար։
«Միայն առաջնորդ Ափոն կարող է ղեկավարել PKK-ի կողմից կայացված որոշման գործնական իրականացումը»,- ասել է նա։
PKK-ի կազմալուծման իրականացման մեթոդը պարզ չէ, սակայն թուրքական կառավարությունը հայտարարել է, որ ուշադիր կհետևի գործընթացին՝ լիարժեք իրականացումն ապահովելու համար։
Հիվան ասել է, որ PKK-ն «լուրջ վերաբերմունք է ցուցաբերել խաղաղության հարցում», սակայն «մինչ օրս թուրքական պետությունը որևէ երաշխիք չի տվել կամ որևէ միջոց չի ձեռնարկել գործընթացը հեշտացնելու համար» և շարունակել է «ռմբակոծություններն ու հրետանային կրակը» քրդական խմբի դիրքերի դեմ։
Թուրքական լրատվամիջոցները հաղորդում են, որ Թուրքիայի տարածքում որևէ հանցագործություն չգործած զինյալները կարող են վերադառնալ՝ առանց քրեական հետապնդման վախի, սակայն PKK-ի առաջնորդները ստիպված կլինեն լքել երկիրը կամ մնալ Իրաքում։
Թարգմանությունը՝ Էմմա Չոբանյանի
