30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Վահագն Խաչատուրյանն ընդունել է պրոֆեսոր Ֆեդերիկո Վիջեվանոյին
30.04.2025 | 17:02
Հանրապետության նախագահ Վահագն Խաչատուրյանն ընդունել է «Էպիլեպսիայի դեսպան», նյարդաբանության և հոգեբուժության պրոֆեսոր, Հռոմի San Raffaele ինստիտուտի տարիքային զարգացման խանգարումների բաժանմունքի ղեկավար Ֆեդերիկո Վիջեվանոյին․ հայտնում են ՀՀ նախագահի աշխատակազմից։
Եռօրյա այցի շրջանակում պրոֆեսոր Վիջեվանոն ծանոթացել է մանկական բժշկական հաստատությունների հնարավորություններին, մասնակցել է կլինիկական բարդ դեպքերի քննարկմանը և իրականացրել խորհրդատվություններ բուժառուների համար։
«Զինվորի տանը» կազմակերպված հանդիսավոր արարողության ընթացքում պրոֆեսոր Վիջեվանոյին շնորհվել է Երևանի պետական բժշկական համալսարանի «Մուրացան» համալսարանական հիվանդանոցի «Այցելու պրոֆեսորի» պատվավոր կոչումը։
Նախագահ Խաչատուրյանը ողջունել է պրոֆեսոր Վիջեվանոյին և շնորհակալություն հայտնել Հայաստան այցելելու և իր արժեքավոր մասնագիտական փորձով կիսվելու համար։
Իր հերթին պրոֆեսոր Վիջեվանոն շնորհակալություն է հայտնել ջերմ ընդունելության և գնահատանքի խոսքերի համար։ Նա նշել է, որ այցի ընթացքում ունեցել է հանդիպումներ հայ մասնագետների հետ և բարձր է գնահատել նրանց մասնագիտական պատրաստվածությունը։ Պրոֆեսորը շեշտել է, որ ակտիվորեն ներգրավված է կրթական գործունեության մեջ և պատրաստ է աջակցել հայ երիտասարդներին՝ ուսման և մասնագիտական զարգացման հնարավորություններ ընձեռելով Հռոմում։
Նախագահ Խաչատուրյանն իր խոսքում հույս է հայտնել, որ ապագայում ևս հայկական կողմը հնարավորություն կունենա կրկին հյուրընկալելու անվանի պրոֆեսորին։
Զրույցի ընթացքում քննարկվել են առողջապահության ոլորտի արդիականացմանը, բժշկական տեխնոլոգիաների զարգացմանը, ինչպես նաև ոլորտի կազմակերպական մի շարք հարցեր։
