08.09.2026 | 22:18
Ֆրանսիան, Մեծ Բրիտանիան և ևս 10 երկիր արգելել են Արևմտյան ափի իսրայելական բնակավայրերից ապրանքների ներմուծումը
Հունգարիայի խորհրդարանը քվեարկել է ՄՔԴ-ից դուրս գալու օգտին
Քաղաքականություն
29.04.2025 | 15:25
Հունգարիայի խորհրդարանը հավանություն է տվել Միջազգային քրեական դատարանից երկրի դուրս գալուն։ Այս մասին հայտնել է երկրի ԱԳ նախարար Պետեր Սիյարտոն X-ի իր միկրոբլոգում։
«Հունգարիայի խորհրդարանը հենց նոր քվեարկեց Միջազգային քրեական դատարանից դուրս գալու օգտին։ Այս որոշմամբ մենք հրաժարվում ենք լինել քաղաքականացված հաստատության մաս, որը կորցրել է իր անաչառությունն ու հեղինակությունը»,- գրել է պաշտոնյան։
Հիշեցնենք, որ ապրիլի սկզբին Հունգարիայի կառավարությունը հայտարարել էր Միջազգային քրեական դատարանից (ՄՔԴ) դուրս գալու մասին։ Երկրի կառավարության բարձրաստիճան պաշտոնյան այդ մասին հայտարարել էր մի քանի ժամ անց այն բանից հետո, երբ Իսրայելի վարչապետ Բենիամին Նեթանյահուն, որը հետախուզվում է ՄՔԴ-ի ձերբակալության օրդերի պատճառով, պետական այցով ժամանել էր Հունգարիա։
ՄՔԴ անդամ լինելով՝ Բուդապեշտը պարտավոր էր կատարել դատարանի որոշումն ու կալանավորել Նեթանյահուին։ Սակայն Հունգարիայի վարչապետ Վիկտոր Օրբանն անձամբ էր վստահեցրել, որ Իսրայելի վարչապետին ոչինչ չի սպառնում իր երկրում։
Թարգմանությունը՝ Էմմա Չոբանյանի
