Ֆրանսիայի նախաձեռնությամբ ՄԱԿ-ի ԱԽ-ն այսօր Ուկրաինային նվիրված նիստ կանցկացնի

Այսօր ՄԱԿ-ի Ավտանգության խորհրդի նիստ է անցկացվելու՝ նվիրված Ուկրաինային։ Այս մասին հայտնում է Ուկրաինայի ԱԳՆ-ն։

Նշվում է, որ Կիևի ժամանակով 23:00-ին ՄԱԿ-ի Անվտանգության խորհուրդը կարևոր նիստը հրավիրել է ԱԽ Ֆրանսիայի նախագահությունը՝ Ուկրաինայի դեմ Ռուսաստանի ագրեսիայի և խաղաղ բնակիչների նկատմամբ շարունակվող ահաբեկչության վերաբերյալ։

Ուկրաինայի ԱԳ նախարար Անդրեյ Սիբիհան շնորհակալություն է  հայտնել ֆրանսիացի գործընկեր Ժան-Նոել Բարրոյին այս հանդիպումը կազմակերպելու և Կիևի հետ ամուր համերաշխության համար։

«Ուկրաինան հանձնառու է խաղաղության ջանքերին։ Մենք 49 օր առաջ համաձայնեցինք ԱՄՆ-ի առաջարկին լիակատար հրադադարի մասին, Ռուսաստանը՝ ոչ։ Սա հստակ ապացույց է այն բանի, թե ով է շահագրգռված խաղաղությամբ, իսկ ով է ցանկանում շարունակել պատերազմը»,- ընդգծել է նա։

Սիբիհան կոչ է արել Անվտանգության խորհրդի անդամներին արտահայտել իրենց վճռական աջակցությունը Ուկրաինայի կողմից խաղաղության ուղղությամբ ձեռնարկվող քայլերին, հստակորեն դատապարտել Ռուսաստանի կողմից խաղաղ բնակչության դեմ ահաբեկչության սրումը և սկզբունքային դիրքորոշում ընդունել Մոսկվայի վրա ճնշումը մեծացնելու անհրաժեշտության վերաբերյալ։

«Արդարադատության, ինքնիշխանության և խաղաղության պաշտպանությունը պետք է լինի համատեղ հանձնառություն։ Ուկրաինան ուժեղ է, բայց ոչ միայնակ»,- ասել է նա։

Հավելենք, որ արձագանքելով Ուկրաինայի նախագահ Վլադիմիր Զելենսկիի 30-օրյա հրադադարի առաջարկին՝ Կրեմլի խոսնակ Դմիտրի Պեսկովն այսօր ասել էր, որ դա հնարավոր է միայն այն դեպքում, եթե հաշվի առնվեն այն «նրբությունները», որոնց մասին ավելի վաղ խոսել է ՌԴ նախագահ Վլադիմիր Պուտինը։

Թարգմանությունը՝ Էմմա Չոբանյանի