Հայտնի են Հայաստանի ազգային պատկերասրահում անցկացված շախմատի մրցաշարի հաղթողները

Հայաստանի ազգային պատկերասրահում անցկացվել է երկօրյա շախմատի մրցաշար, որը կազմակերպել էր Freedom Broker Armenia-ն՝ «Chessify» ընկերության և Հայաստանի շախմատի ակադեմիայի աջակցությամբ։

Մրցաշարի եզակիությունն արտահայտվում էր ոչ միայն իր մշակութային բացառիկ վայրով, այլև յուրահատուկ ձևաչափով։ Մրցաշարը սիրողական էր. մասնակցում էին Հայաստանում գրանցված կազմակերպությունների աշխատակիցներից կազմված թիմեր՝ բացառությամբ պրոֆեսիոնալ շախմատային կառույցների։

Միջոցառման հիմնական նպատակն էր խթանել ինտելեկտուալ համագործակցությունը, ամրապնդել թիմային ոգին և զարգացնել գործարար կապերը շախմատի միջոցով:

Մրցաշարի արդյունքում առաջին հորիզոնականը զբաղեցրեց Premier Foods and Beverages ընկերության թիմը։ Երկրորդ տեղում SoftConstruct ընկերությունն էր, երրորդում՝ Ա. Ի. Ալիխանյանի անվան ազգային գիտական լաբորատորիան։ Անհատական հաշվարկներով՝ առաջին խաղատախտակում լավագույն արդյունքը ցուցաբերեց Սարգիս Սարգսյանը (Krisp), երկրորդում՝ Կարեն Չախոյանը (Հայաստանի ազգային ագրարային համալսարան), երրորդում՝ Կիտի Նադանյանը (Legal Business Support), ով նաև լավագույնն էր կանանց մրցապայքարում, դե իսկ չորրորդ խաղատախտակում լավագույնն էր Արամ Սարգսյանը (Հայաստանի աուդիտորների և փորձագետ հաշվապահների պալատ):

Նշենք, որ առաջին տեղ գրաված թիմի անդամները ստացան Freedom Holding Corp.-ի (NASDAQ: FRHC) 3-ամսյա բաժնետոմս: Լավագույն արդյունք ցուցաբերած մասնակիցները ստացան հատուկ մրցանակներ՝ կեցություն «DiliJazz Hotel & Restaurant»-ում և «Perfecta Wellness & Spa»-ի նվեր քարտ։

«Չեսիֆայ» ընկերությունը հաղթող թիմի անդամներին տրամադրեց «Master Combo» փաթեթի ամսական բաժանորդագություն, իսկ խաղատախտակների վրա լավագույն արդյունք ցույց տված մասնակիցներին՝ «Chessify Coin»։

«Այս մրցաշարը յուրահատուկ էր թե՛ իր անցկացման վայրով, թե՛ իր գաղափարով: Freedom Broker Armenia-ի համար կրթությունը, խելամիտ մտածելակերպը և թիմային աշխատանքը միշտ եղել են մեր հիմնական արժեքները: Հենց դրա համար էլ մենք ընտրեցինք շախմատը՝ որպես մեր մոտեցման խորհրդանիշ, որը պահանջում է խորը մտածելու, հաշվելու և ճշգրիտ որոշումներ կայացնելու ունակություն: Շախմատը նաև հնարավորությունների աշխարհ է. այստեղ տարիքը, հասարակական դիրքը կամ փորձը կարևոր չեն: Կարևորը մեկ բան է՝ մտածելու կարողությունը: Սա ուղիղ կապ ունի մեր տեսլականի հետ․ մենք հավատում ենք, որ դրամական անկախությունը և ներդրումների մասին գիտելիքները հասանելի են բոլորին, ովքեր պատրաստ են սովորել, աճել և գործել: Ուրախ եմ, որ այս մրցաշարին մասնակցում էին տարբեր կազմակերպությունների թիմեր՝ մշակույթի, ֆինանսների, տեղեկատվական տեխնոլոգիաների և այլ ոլորտներից: Սա լավագույն ապացույցն է, որ թե՛ բիզնեսում, թե՛ կյանքում հաջողությունը գալիս է ոչ միայն փորձից, այլև ճիշտ պահին ճիշտ քայլ կատարելուց», – նշել է Freedom Broker Armenia-ի տնօրեն Հովակ Հովակիմյանը: