Քաղաքականություն
23.04.2025 | 12:13
Չինաստանի նախագահ Սի Ցզինպինը և Ադրբեջանի նախագահ Իլհամ Ալիևը Պեկինում համապարփակ ռազմավարական գործընկերության մասին հայտարարություն են ստորագրել։ Դրա շրջանակում նախատեսվում է համագործակցություն շուրջ 20 ոլորտներում: Ադրբեջանական լրատվամիջոցները հրապարակել են հռչակագրի ամբողջական տեքստը։
Ադրբեջանի և Չինաստանի միջև ստորագրվել է Միջազգային մուլտիմոդալ փոխադրումների մասին համաձայնագիրը, ինչպես նաև համագործակցության ծրագիր՝ «Մեկ գոտի, մեկ ճանապարհ» նախաձեռնության համատեղ առաջմղման վերաբերյալ:
Չինաստանի նախագահն Ալիևի հետ հանդիպմանը հայտարարել է, որ սակագնային և առևտրային պատերազմները վնաս են հասցնում բազմակողմ առևտրային համակարգին և ազդում համաշխարհային տնտեսական կարգի վրա: Սի Ցզինպինը հավելել է՝ Չինաստանը պատրաստ է համագործակցել Ադրբեջանի հետ միջազգային համակարգի պաշտպանության համար և «խորացված» համագործակցություն իրականացնել իրավապահ և անվտանգության ոլորտում:
Ավելի վաղ Աստանայում Շանհայի համագործակցության կազմակերպության գագաթնաժողովի շրջանակում «Ադրբեջանի Հանրապետության և Չինաստանի Ժողովրդական Հանրապետության միջև ռազմավարական գործընկերության հաստատման մասին համատեղ հռչակագիր» էր ընդունվել։
Հայաստանում Չինաստանի գործերի ժամանակավոր հավատարմատար Մին Չենն էլ թուրքական Turkiye gazetesi-ն տված հարցազրույցում հայտարարել է, որ Չինաստանը պատրաստվում է նոր գլուխ բացել իր «Մեկ գոտի, մեկ ճանապարհ» նախաձեռնության շրջանակում։ Ըստ նրա՝ Չինաստանը պատրաստվում է Հայաստանին ներառել իր տրանսպորտային ցանցում՝ կատարելով ևս մեկ ուշագրավ քայլ իր պատմական «Մեկ գոտի, մեկ ճանապարհ» նախաձեռնության շրջանակում։ Մին Չենն ասել է, որ Չինաստանը շուտով համաձայնագիր կստորագրի Երևանի հետ տրանսպորտի ոլորտում, և որ այդ նախագծերը կփոխեն Հարավային Կովկասի տնտեսական քարտեզը։
