Ադրբեջանն ու Չինաստանը ռազմավարական գործընկերության համատեղ հռչակագիր են ընդունել

Աստանայում այսօր Շանհայի համագործակցության կազմակերպության գագաթնաժողովի շրջանակում «Ադրբեջանի Հանրապետության և Չինաստանի Ժողովրդական Հանրապետության միջև ռազմավարական գործընկերության հաստատման մասին համատեղ հռչակագիր» է ընդունվել, գրում են ադրբեջանական լրատվամիջոցները։

Հռչակագրում նշվում է, որ միջազգային և տարածաշրջանային իրավիճակի լույսի ներքո կողմերը պայմանավորվել են ընդլայնել համագործակցությունը քաղաքական, տնտեսական և մշակութային ոլորտներում, ամրապնդել համագործակցությունը միջազգային հարցերում, համատեղ պաշտպանել երկու երկրների ընդհանուր շահերը և համատեղ առաջ մղել տարածաշրջանային և գլոբալ խաղաղությունը, կայունությունը։

Ասվում է, որ կողմերը հաստատում են ռազմավարական գործընկերություն՝ հիմնված փոխադարձ հարգանքի, հավասարության, վստահության, փոխադարձ աջակցության, փոխշահավետության և համագործակցության վրա՝ որպես երկկողմ հարաբերությունների հիմնարար սկզբունքներ։ Կողմերը միմյանց համարում են առաջնահերթ և վստահելի գործընկերներ ու ինքնուրույն որոշում են երկկողմ հարաբերությունների քաղաքականությունը՝ անկախ արտաքին գործոններից։

Կողմերը վերահաստատում են իրենց հանձնառությունը տարածքային ամբողջականության և ինքնիշխանության փոխադարձ հարգանքի, չհարձակման, ներքին գործերին չմիջամտելու, իրավահավասարության և փոխշահավետության և խաղաղ գոյակցության նկատմամբ։ Ադրբեջանական կողմը վճռականորեն պաշտպանում է «Մեկ Չինաստանի» սկզբունքը, ընդունում է, որ աշխարհում կա միայն մեկ Չինաստան, Չինաստանի Ժողովրդական Հանրապետության կառավարությունը միակ օրինական իշխանությունն է, որը ներկայացնում է ողջ Չինաստանը, իսկ Թայվանը չինականի անբաժանելի մասն է, կտրականապես դեմ է «Թայվանի անկախության» ցանկացած ձևին և աջակցում է միջնեղուցային հարաբերությունների խաղաղ զարգացմանը, ինչպես նաև Չինաստանի վերամիավորման համար Չինաստանի կառավարության ջանքերին։

«Չինական կողմը վճռականորեն աջակցում է ադրբեջանական կողմի առաջարկած խաղաղության օրակարգին և հակաարդյունավետ է համարում աշխարհաքաղաքական ինտրիգները, որոնք ուղղված են առճակատման պահպանմանը»,-ասվում է հայտարարության մեջ։

Նշվում է նաև՝ կողմերն ընդգծում են, որ «ահաբեկչությունը, անջատողականությունը և ծայրահեղականությունը լուրջ վտանգներ են ներկայացնում ամբողջ միջազգային հանրության համար և պահանջում են ընդհանուր ջանքերի միավորում՝ այդ մարտահրավերները կանխելու և հակազդելու համար»։ Կողմերը պատրաստ են սերտ շփումներ և համակարգում իրականացնել ազգային, ինչպես նաև տարածաշրջանային և գլոբալ անվտանգության կարևորագույն հարցերի շուրջ, ամրապնդել վստահությունը և թույլ չտալ որևէ ուժի օգտագործել իրենց պետության տարածքը՝ մյուս կողմի դեմ գործողություններ իրականացնելու համար։

Երկու երկրները նաև աջակցելու են  միմյանց ջանքերին՝ իրենց տարածքներով անցնող միջազգային տրանսպորտային միջանցքների անվտանգության և անխափան շահագործման ապահովման հարցերը լուծելու հարցում, ազգային օրենսդրության և երկկողմ համաձայնագրերի շրջանակում բարենպաստ պայմաններ կստեղծեն տարանցիկ փոխադրումների համար։

Նշենք, որ Աստանայում այսօր ավելի վաղ տեղի էր ունեցել Չինաստանի ղեկավար Սի Ցզինպինի հանդիպումը Ադրբեջանի նախագահ Իլհամ Ալիևի հետ։

Էմմա Չոբանյան